NAGSAYSAY ang usa ka mitahan nga sakop sa New People's Army (NPA) nga nag-edad og 12-anyos nga mga batang lalaki ang ilang nakauban sa pagpangatake sa mga sundalo niadtong Pebrero 1 didto sa Manay, Davao Oriental.

Si Ka Junie, 31, sakop sa Front Committee 15 sa NPA, maoy nagbutyag niini atol sa gihimo nga Armed Forces of the Philippines-Philippine National Police press conference sud sa Davao City Police Office, Miyerkules sa buntag, Pebrero 8.

Si Ka Junie nagsulti nga usa siya sa 30 ka mga rebelde nga na-engkuwentro sa kasundalohan sa Barangay Lambog, Manay, Davao Oriental, diin namatay si 2nd Lieutenant Miguel Victor Alejo, platoon leader sa 67th Infantry Battalion sa Philippine Army.

“Ang pinakabata sa amo ang 12-anyos, naay 15-anyos, ug naa say 16-anyos nga nakauban sa giyera sa Manay, ug sa uban namong lakaw,” suma ni Ka Junie.

Siya nagsulti nga tungod sa kalisud sa kinabuhi sa bukid uban sa NPA, ang nagtukmod kaniya nga motahan sa militar.

“Mi-surrender ko dala akong AK-47 nga armas kay gikapoy nako sa bukid, pulos lang sila pasalig,” saysay ni Ka Junie.

Gisaysay sab niya ang gihimo nila nga pagpanghasi sa komunidad lakip na ang pagpang-recruit sa mga bata ug pagpangilkil sa katawhan.

Sa maong press conference, si 10th Infantry Agila Division commander Major General Rafael Valencia nanawagan nga motahan na sa gobyerno ang ubang sakop sa NPA.

“We encourage other NPA terrorist members to return to the folds of the law, may panibagong buhay na nag-aabang sa inyo, may livelihood program tayo para sa inyo,” sulti ni Valencia.