USA ka inahan, iyang igsuon, ug batabata nangadakpan sa buy-bust operation sa miaging gabii sa Barangay Cogon, lungsod sa Tuburan.

Si Lu Ann Genson, 31, minyo, giilang level 3 drug pusher, nadakpan uban ang iyang igsuon nga si Roderick Dela Cerna, 37, biyudo, ug batabata nga si Dindo Naingue, hingkod, kinsa napusilan sa iyang walang kamot.

Si PO1 Matt Roco, sakop sa intelligence sa Tuburan Police, niingon nga si Naingue, napusilan sa ilang hepe nga si Sr. Insp. William Homoc human nibunot og granada aron unta labayon ang mga pulis.

Matod pa niini nga human sa usa ka bulan nga pagpaniid ni Genson, gilusad ang buy-bust operation nila, nipalit sila’g usa ka pa­kite nga shabu nga mobalor og P300.

Ang tulo nga nagkunsabo nagpasa sa kuwarta ug shabu atol sa transaction hinungdan nga gidakop gilayon.

Pero si Naingue kalit nga nikuha sa granada diha sa iyang bulsa aron unta sila labayon, apan sa wa pa siya makaibot sa pin napusilan na siya ni Homoc.

Human sa pagkasikop, gipatuman gilayon nila ang search warrant nga gi-isyu ni Judge Hermes Nontero, sa Regional Trial Court (RTC-7) branch 59, sa dakbayan sa Toledo.

Si Roco nagkanayon nga sa sulod sa panimalay ni Genson, nakuha sa awtoridad ang daghang mga drug paraphernalia, pito ka putos nga shabu, duha ka mga motorsiklo ug P670 nga halin sa drugas.

Gibutyag niya nga dugay nadakpan si Genson tungod kay daghang nagbantay niini, samtang ang balay niini platsada kaayo makita ang mga tawo nga mosulod.

Sumala pa niya siya maoy nihulip sa iyang bana nga si Allan Genson, kinsa bigtime drug pusher sa Tuburan, apan nadakpan sa kapulisan sa miaging tuig.

Samtang nahibaw-an sab nila nga si Naingue nibahad sa kapulisan nga di magpadakop nga buhi hinungdan nga nisukol, nanglabay sa granada.