LALAKE nga gituohang gi-salvage, napalgang patay nga ginapos ug buak ang ulo sa miaging alas 10:10 sa gabii sa hilit nga lugar sa Sitio Bangko, Barangay Valencia, dakbayan sa Carcar.

Sa pagsuwat ning taho, ang wa pa mailhing lalake gibana-banang dunay 5’3 ngadto sa 5’4 ang gitas-on, nagsul-ob og sweat shirt nga puwa, nagmaong og karsones, kasarangan ang pamanit ug panglawas.

Si SPO3 Jorame Ta­nudtanod, imbestigador Car­car Police Station nga nahinabi sa Sun.Star Superbalita, nagkanayon nga ang mga lumolupyo sa lugar nakadungog og buto-buto sa armas.

Human sa buto-buto sa armas, dunay sak­yanan nga nagdali sa pagbiya sa dapit.

Sa pagsusi sa mga residente uban sa mga barangay tanod, ilang napalgan ang usa ka lawas sa usa ka lalake nga nagbuy-od.

Si Tanudtanod nagkanayon nga gi-salvage ang biktima kay ilang nakita nga ang mga kamot niini gibinaklid sa paggapos ginamit ang panapton.