GIPAABOT nga maminosan ang nasinati nga rotational brownout sa Sugbo sa pagsulod na og balik sa unit I sa Kepco-Salcon Power Corp. sa Visayas grid nga nag-supply og 100 megawatts nga kuryente.
Sa dili pa matapos ang buwan sa Hunyo, mabalik na usab ang unit 2 sa KSPC nga gipaubos og preventive maintenance ug aduna usay kapasidad nga 100 mw.
Ang KSPC niingon nga ang mga technical personnel niini nahuman na og trabaho sa conveyor line ug electrical systems nga nadaot human sa sunog nga niigo sa coal crusher building sa planta niadtong Mayo 30, 2015.
“Kepco SPC Power Corporation’s Unit No. 1 synchronized at 11:59 p.m. on June 3, 2015 and is now supplying back 100 megawatts of power to the Visayas grid,” tipik sa press statement nga gipadala sa KSPC sa Sun.Star Superbalita kagahapon.
Ang Unit 2 sa KSPC gipaabot nga mosulod og balik sa grid karong Hunyo 22 human unya sa preventive maintenance niini.
Si Gobernador Hilario Davide III mopatawag sa tagdumala sa KSPC aron magpakisayod sa kahimtang sa planta sa dakbayan sa Naga human nasunog niadtong Sabado sa buntag.
“We will ask Kepco to brief us how that affect the power situation here,” namahayag ang gobernador.
Wa pa hinuon siya makadawat og reklamo gikan sa mga magpapatigayon nga naapektuhan ang negosyo gumikan sa brownout.
Apan siya niawhag sa dagkong mga kompaniya nga nagkonsumo og dakong kuryente nga mosunod sa gibuhat sa ubang mga kompaniya nga mga konsumedor sa Visayan Electric Company nga nagpatuman og Interruptible Load Program.
Ubos sa ILP, ang kompaniya mogamit sa iyang kaugalingon nga generator sets ug kini bayaran sa Veco.
“I think they should do that to ease the burden sa power consumption... I’d like to ask everyone save energy,” dugang sa gobernador.
Ang Veco padayong nipatuman og usa ka oras nga rotational brownout tungod sa 24.9 mw nga kakuwang sa kuryente kagahapon human niluwat og power shortage alert notice ang National Grid Corp. of the Philippines.