KATAPUSANG termino na ni Governor Rodolfo del Rosario sa Davao del Norte sa 2016, ug natural ang mga pangutana kanunay magbalik-balik kinsa kaha ang mosunod nga gobernador sa probinsiya?

May mga balita nga gisalo-salo sa pipila ka sakop sa media nga si Congressman Anton Lagdameo Jr. kuno, sanglit katapusang termino na niya sa 2016.

Si Congressman Anthony Garcia del Rosario sa unang distrito sa dihang atong gipangutana, dili daw siya interesado kay tapuson niya ang iyang termino nga mahuman usab sa 2016.

Kining tanang mga pangutana, natuldokan niadtong milabaye'ng Lunes sa hapon diha sa Seda Hotel.

Nagkatapok ang pamilyang Floirendo ug del Rosario niadtong tungora ug mismo si Antonio "Tonyboy" Floirendo ang nagsulti atubangan ni Governor del Rosario nga ang mosunod nga gobernador sa DavNor mao si Rodolfo "Rodney" del Rosario Jr.

Dili pa politiko, apan anak og politiko. Siya ang magulang nga lalaki ni Congressman AGR. Kining maong kasayuran gikan ni Jun Ledesma, ang publisher sa weekly news Mindanao Journal nga maoy bugtong saksi niadtong tungura.

Dinhi usab natuldokan ang mga balita nga duna kunoy hilom nga panagbangi ang pamilyang Floirendo ug del Rosario. Kaniadto pa kining balitaa, pero migawas gyud ang kamatuoran nga mas bug-at ang relasyon sa dugo kaysa tubig. Ang tanan pulos lang intriga.

Sumala sa atong inpormante, ang chairman sa Anflo Group of Company nga si Floirendo, siya ang mobalik pagka-congressman sa second district sa probinsiya.

Sa atong gamay nga pangagpas, walay moparang kang Rodney pagka- gobernador sa probinsiya, sanglit ang mga Floirendo ug del Rosario ang gitahod ug girespeto sa mga gagmay'ng politiko sa probinsiya.

Si Governor RDR asa siya karon? Moretiro na kaha siya sa politika?

May mga balita nga modagan daw siya pagka-mayor sa Island Garden City of Samal (Igacos). 38 ka tuig na si RDR sa politika karong 2016.

Maayo unta una ka moretiro Gov., mag-mayor ka usa sa Isla sa Samal.

Sa tinuod lang, sukad nahimong siyudad ang maong Isla niadtong 1998 ug gikuptan sa magsuong Antalan, walay tarong nga kalamboan.

Ikaw may naghimo nga siyudad sa Isla, mas maayo seguro bag-o ka moretiro molambo pa ang siyudad sa samal kon ikaw ang mahimong mayor sa 2016. Puwede kaha?