LIMA ka adlaw human gibuksan ang klase sa elementarya ug sekondarya sa pangpublikong tulunghaan, mosunod na sab sunod semana ang pagbukas sa mga pribadong eskuwelahan, apil na ang mga kolehiyo.
Sa maong panahon, moguot na sab ang mga kadalanan sa mga sakyanan gumikan kay magdungan man ang mga tinun-an ug mga empleyado nga manulod sa ilang mga buhatan sa buntag nga usahay maoy hinungdan nga madelatar og sulod sa klase.
Tungod niini, kinahanglan nga magsayo og mata ang mga estudyante aron nga di maipit sa trapik ug makaabot og sayo sa eskuwelahan.
Angay nga matulog og sayo aron nga makamata sab og sayo.
Gawas niini, maglaray na sab unya sa mga daplin sa eskuwelahan ang mga vendors nga mamaligya og mga nagkadaiyang mga pagkaon kay halin man kaayo sa mga estudyante.
Naandan sab kini nga panginabuhi sa pipila nato ka mga kaigsuonan kay abli na man sab ang klase.
Apan angay natong hibaw-on nga di tanang pagkaon nga gibaligya sa mga gagmay nga tindahan sustansiyado.
Duna na say uban nga imbis nga makapabaskog, magdala hinuon og sakit ngadto sa kabataan. Mao sab ang ginabaligya nga mga mainom aron sa paghupay sa kauhaw.
Angay nga imonitor kini sa City Health Office ug uban pang ahensiya sa kagamhanan aron nga malikay ang mga kabataan sa mga sakit.
Kay base sa taho sa Department of Health (DOH) mitaas na ang kaso sa nagsakit og diabetes ug pabata na sab ang nagkasakit niini gumikan sa pagkaon og mga junk foods ug pag-inom og mga carbonated drinks o softdrinks.
Dinhi sa dakbayan, di malikayan nga mga bata mamalit og pagkaon gikan niining mga gagmay nga tindahan nga naa ra sa duol sa eskuwelahan.
Busa angay nga imonitor kini sa atong mga otoridad aron nga di sila magpataka og baligya og mga junk foods ug mga carbonated drinks nga maoy hinungdan sa pipila ka mga sakit sa mga kabataan.
Magpakabana sab unta ang atong mga ginikanan nga di tugotan ang ilang kabataan nga mamalit niini nga matang sa pagkaon kay makadaut sa ilang panglawas. Inay mas maayo pang lutuan ug pabalunan og mga masustansiya nga pagkaon nga sila mismo ang naghimo aron nga pabilin nga himsog ang panglawas sa ilang mga anak.