MIINGON si Presidente Duterte nga adu­nay Korean mafia dinhi sa Sugbo nga nagpadagan og prostitusyon, nagpayuhot og ginadiling drugas ug mohimo og kidnapping.

Kon nakadungog ka sa pamahayag ni Presidente Duterte imong mahulagway ang Sugbo nga usa ka dapit diin grabe ang krimi­nalidad tungod niining iyang gitawag nga Korean mafia. Ambut og si kinsay nag­hatag niining maong sayup nga impormasyon sa presidente.

Gani ang kadagkuan sa Philippine Natio­nal Police (PNP) nakurat sa dihang una nilang nadungog ang maong pamayahag apan ila lang usab dayong gidasunan ang presidente.

Apan si Philippine Drug Enforcement Agency (PDEA) 7 Director Yogi Filemon Ruiz mihimakak nga adunay mafia nga nagpayuhot og binultong shabu ug ubang ginadiling drugas. Miangkon hinuon siya nga adunay pipila ka mga Koreano nga mamaligya og drugas para kunsomo sa ilang kadugo.

Mireklamo usab ang consul general sa Korea niining maong balita. Miingon siya nga kanunay ang kumonikasyon tali kanila ug sa kapolisan ug military apan wala siya pahibaw-a kalabut niining giingong Korean mafia.

Dili ako mutuo nga adunay napormang Korean mafia dinhi sa Sugbo. Akong pangagpas nga mga badlungong Koreano kining mipahimus sa ilang mga paisano.

Tinuod nga nakadaut kini sa imahen sa nasud sa South Korea apan ang maong pasangil labaw nga nakadaut sa Sugbo.

Mahimung moislag na ang mga negos­yante ug mga turista sa pagbisita dinha sa atong lalawigan tungod lang niining maong pa­sangil nga walay kamatuoran.

***

Samtang gisaway nato kining giingong mafia dunay mga Sugboanon nga naghinamhinam sa pag-abut niining usa ka himalitang ice cream sa Korea nga mao ang Milk. Usa kini ka premium organic product dessert café nga gikan sa Korea.

Usa usab ka makaayo sa lawas nga kalan-on mao kining Korean kimchi. Pechay (mura) kini nga gi-preserve unya gibutangan og daghang sili maong halang kaayo. Libre kun pakapin lang kini sa among paliton nga sinugbang karne sa baboy sa suki namong tindahan ni Pare Bobby. Mawala ang halang niini kon limugmogan nimo og beer.

NPA dili kasaligan

Uyon ako sa desisyon ni Presidente Duterte nga pag­libkas sa ceasefire agreement tali sa atong gobiyerno ug sa Communist Party of the Philippines – New People’s Army – National Democratic Front of the Philippines (CPP-NPA-NDFP).

Ang atong eksperiyensia sukad pa sa milabay nga mga administrasyon nga dili gayud mulampos ang peace talk tali sa mga komunistang rebelde kay ang ilang tumong ug tuyo mao man ang pagpuli sa atong sistema sa panggobiyerno karon ngadto sa komunismo.

Supak usab sila sa kalinaw kay wala na man unya silay madawat nga salapi gikan sa mga komunista sa ubang kanasuran nga maoy ilang padrino.

(msr1144@yahoo.com)