NIPASALIG si House Speaker Pantaleon Alvarez nga mapasar gyud sa House of Representatives ang balaudnon nga magbuhi sa silot sa kamatayon alang niadtong mga heinous crimes kun linuog nga mga krimen.

Si Leyte Rep. Vicente Veloso, usa sa nangamahan sa balaudnon nga magpabalik sa silot sa kamatayon, niingon nga ang labing bug-at nga silot mahimo na unya nga RIP gikan sa RP.

Gikan sa RP kun silot nga reclusion perpetua o pag­kabilanggo hangtod sa 40 ka tuig ngadto na sa RIP kun “rest in peace.”

***

Niadtong miaging Kalag-Kalag, duha ka manag-amigo nisuroy sa sementeryo. Usa kanila nakakomentaryo sa dihang nakakita sa usa ka netso ug niingon, “Salbahis gyud ang kriminal nga nagbuhat niini, bay.”

“Ngano man?” pangutana sa iyang amigo. “Tan-awa ra gud. Gilugos unya gipatay pa gyud. Naa ay, klaro kaayo kay gibutangan og RIP.” “Di bay, kanang lugos rape na, kanang RIP, rest in peace.”

Ang rape usa lang sa 21 ka mga linuog nga krimen nga buot pahamtangan sa silot sa kamatayon sa atong mga magbabalaud ubos sa House Bill No. 4727.

***

Ang pagpahamtang sa death penalty gi-abolish niadtong 2006 sa Republic Act (RA) No. 9346. Apan ubos sa bag-ong administrasyon, gilusad ang gubat batok sa illegal nga drugas nunot sa tinguha nga ibalik ang silot sa kamatayon.

Mokabat sa kapin sa 7,000 ka mga suspetsado sa illegal nga drugas ang napatay sa wa pa suspensoha ni Presidente Rody Duterte ang gubat batok sa druga diin gidid-an sa Philippine National Police ug ang National Bureau of Investigation sa paghimog mga anti-drug operations.

Sa ato pa, hilabihan na kadaghan sa nangamatay bisan wa pa mahibalik ang silot sa kamatayon. Ug ang kadaghanan sa gipangpatay mga kabus.

***

Si Albay Rep. Edcel Lagman, nga nisupak sa pagpabalik sa silot sa kamatayon, niingon nga mas maayo nga ang House Bill No. 4727 nga magbuhi sa silot sa kamatayon maoy patyon.

Didto sa Senado, gisuspenso ni Senador Richard “Dick” Gordon, ang chairman sa Senate justice committee, ang pagtuki sa balaudnon nga magpabalik sa silot sa kamatayon tungod kay ang Pilipinas usa man sa mga signatories sa Second Option Protocol sa International Convention on Civil and Political Rights (ICCPR) mahitungod sa pag-abolish sa silot sa kamatayon.

Gi-ratify sa Senado ang maong treaty, ug matod pa ni Senate President Pro Tempore Franklin Drilon, way probisyon sa maong treaty nga naghatag kahigayonan sa Pilipinas nga mosibog gikan niini. Patay ang death penalty.