GIHIMAKAK sa opisyal sa Department of Interior and Local Government (DILG) 7 bahin sa taho nga gipatuman na nila ang kamanduan sa Ombudsman pagtaktak kang Dumanjug Mayor Efren Guntrano Gica.

Si Director Rene Burdeos sa DILG7 niingon nga wala pa sila makadawat ug kopya sa kamanduan sa Ombudsman ug labaw nang wala’y kamanduan ang ilang ulohang buhatan alang sa pagpatuman niini.

Una niini, dunay text messages nga nikatap kagahapon labot sa giingong presensiya sa upat ka mga tawo sa DILG sa Dumanjug kagahapon sa buntag sa pag-serve na sa dismissal order batok ni Mayor Gica.

Apan si Gica dihang niingon nga tinuod nga dunay taga DILG nga niduaw sa ilang lungsod ug iyang nahimamat ang provincial director nga si Jerome Gonzales ug dili bahin sa dismissal ang ilang tuyo apan ang Bottoms Up Budgeting (BUB) program.