BISAN sa subsub nga kampanya sa Traffic Enforcement Agency of Mandaue (TEAM) kalabot sa pagtuman sa balaod trapiko, daghan gihapon ang nadakpan nunot sa kalapasan sa jaywalking ug no-stopping.
Sa pinakauwahing talaan sa Team, gikan sa unang adlaw sa istriktong implementasyon sa anti-jaywalking sa kadalananan sa dakbayan, gikan sa 51 ka mga dinakpan niadtong Enero 23, nisaka ngadto sa 433 niadtong Lunes ang mga nasikop sa jaywalking.
Samtang nius-os hinuon ang mga nasikop sa no-stopping gikan sa 288 niadtong Enero 23 ngadto na sa 165 ka dinakpan niadtong Pebrero 6.
Gikan Enero 23, mokabat na ngadto sa 2,597 ang mga nadakpan sa Team tungod sa jaywaking samtang 2,260 ka mga drayber usab ang nasikop nga mga drayber tungod sa pagpataka og hunog.
Matag adlaw, kapin sa 300 ang masikop sa TEAM nunot sa jaywalking, samtang kapin sa 200 sab nunot sa no-stopping, sumala pa ni Glenn Atigua, pangulo sa TEAM sa dihang nahinabi sa mga tigbalita kagahapon.
Sa Pebrero 1 natala ang pinakadaghang nasikop sa jaywalking nga may 497 ka mga dinakpan.