NAPU ka mga tawo ang gikatahong nangaangol human magbangga ang duha ka mga sakyanan sa South Road Properties (SRP) atubangan sa ABC building pasado alas 2 kagahapon sa hapon.

Ang nagbangga mao ang pu­ti nga Toyota Rav 4 (AAZ-6573) nga gimaniho ni Santiago Tanchan, taga Don Mariano Cui st., ug ang multicab (temporary plate number 122602) nga gimaniho ni Arnold Arias, taga Barangay Tapol, siyudad sa Talisay.

Sigun sa pasiuna nga imbestigasyon sa Traffic Division nagbut­yag nga gikan sa Talisay si A­rias nagpaingon sa norte,

Si Tanchan gikan usab sa norte paingon ug south.

Apan sa dihang niliko pawala si Tanchan, kalit siya nga nawagtangan sa control sa iyang sakyanan nga nisaka sa sa center island ug nitabok sa pikas nga lane.

Niadtong tungora, si Arias nga nagdagan paingon sa norte maoy gikasugat ni Tanchan.

Tungod sa kakusog sa panagbangga, napiit sa front seat si Arias ug napalabay ang mga tawo nga nagsakay sa luyo sa multicab.

Daling nakaresponde ang Cebu City Emergency Response Team ug na­kuha si Arias nga napiit sa sakyanan.

Daling gidala sa Cebu City Medical Center (CCMC) si Arias ug ang iyang mga sakay, samtang si Tanchan anaa sa Chong Hua Hospital.