NAGSUGOD sa pagpanglimpyo sa ilang han-ay ang Cebu Provincial Police Office gikan sa mga badlungon pinaagi sa pagrelibo sa 16 ka mga pulis.
Matod ni CPPO Director Sr. Supt. Eric Noble nga ang mga ngalan sa maong mga pulis maoy ningtumaw sa gihimong imbestigasyon niadtong mga nalambigit sa ilegal nga drugas, illegal gambling ug ubang krimen sa ilang lugar diin sila nadestino.
Matag adlaw mohimo sila og formation alang sa flag raising ceremony ug ipaubos sa values formation aron matul-id ang ilang hiwi nga binuhatan.
Ipaubos usab sila sa imbestigasyon lakip na ang pagsusi sa ilang lifestyle kon ang ilang kabtangan motakdo ba sa ilang suweldo nga madawat matag buwan.
Dugang ni Noble nga dunay pastor nga mohatag kanila og lecture matag adlaw isip kabahin sa ilang spiritual counseling procedure.
“May mga various reports that they were involved in certain illegal activities. So, sabi ko gusto kung makita ang pagmumukha nila dito. So, nandyan sila araw-araw” matod ni Noble.
Tinguha niya nga mausab ang pangutok sa maong mga pulis aron mobalik sa maayo nga kinabuhi ug dunay maayong direksyon.
Dunay grupo sa mga pastor nga gitawag ug Bless our Cops diin sila ang mohimo ug spiritual counseling sa mga pulis nga nagpabadlong.
Nagtuo si Pastor Jonathan Acosta, usa sa mga sakop sa Bless Our Cops Ministry, nga duna pay purohan nga magbag-o ang maong mga pulis pinaagi sa paghatag kanila og espiritohanong giya ug abag sa kahitas-an kon moabag usab sila sa ilang kaugalingon.
“We believe nga there is no impossible with the Lord mao na atung gituohan. Kini sila kahibalo ta nga naa ni silay tinguha nga magbag-o,” matod ni Acosta.
Padayon nga panid-an sa hepe sa CPPO ang maong mga pulis.
Kon way kabag-ohan sa ilang kinabuhi, iduso ngadto sa Camp Crame ang mga ngalan niini aron ipaubos sa imbestigasyon ug validation.
Samtang magpadayon usab ang CPPO sa ilang pagsusi sa ubang pulis nga nalambigit sa ilegal nga kalihukan aron isunod sa pagpaubos sa pakisusi.