PAKYAS ang kapulisan sa probinsya sa Sugbo pag­dakop sa mga kombiktadong opisyal sa lungsod sa Aloguinsan atol sa pag serve sa warrant of arrest.

Ang mga subject sa warrant mao silang kan­hi Aloguinsan Mayor Cyn­thia Moreno, Municipal Budget Officer Nonela Villegas, Municipal Agriculture Officer Marilyn Flordeliza, Municipal Assessor John Lim, Municipal Engineer Orven Nengasca, Municipal Civil Registrar Pepito Mangui­limotan ug ang duha ka utility workers nga sila si Gertrudes Ababon ug Emilia Luz Celis.

Sila nalutsan og warrant of arrest gikan sa First Division sa Sandiganbayan sa kasong paglapas sa Anti Graft and Corrupt Practices Act tungod sa pagpamalit og construction materials niadtong 2007 nga waay gihimong public bidding.

Matod ni Sr. Supt. Eric Noble, hepe sa Cebu Provincial Police Office, nga wa na sa ilang tagsa-tagsa ka mga balay ang mga kombiktadong opisyal.

Tungod niini, nimando si Noble sa kapulisan sa lungsod sa Aloguinsan pagpangita sa kanhi opis­yal ug mga kauban.

Nagtuo si Noble nga nia pa sa Sugbo sila si Mo­reno hinungdan nga iyang gimandoan ang Alo­guinsan police station nga mokuha og mga hulagway aron ipakatap sa mga police station ug Facebook.

Dako ang posibilidad nga nasayod na sila nga duna nay migawas nga warrant of arrest nga ma­oy hinungdan nga nag­ta­gotago, dugang ni Noble.

Awhag niya sa kanhi mayor ug mga kauban nga lakip sa giila nga wanted person nga motahan ug atubangon ang gimando sa korte kanila.

Plano nila nga makigtagbo sa mga kabanay aron hangyuon nga i-surrender sila sa kapulisan.

“Surrender peacefully, harapin na lang nila yun. Anyway, nagkaroon naman ng due process, di ba? So, tanggapin natin kung ano ang proseso sa batas” matod ni Noble.

Dugang ni Noble nga giila na nila sila si Moreno ug mga kauban nga wanted.

Makig-alayon usab sila sa Bureau of Immigration aron mabantayan kon mosuway pagbiya sa nasud agi sa Mactan Cebu International Airport (MCIA).

Ang abogado ni Moreno nga si Inocencio dela Cerna, niingon nga di siya motuo nga nagtago-tago ang iyang kli­yente ug mga kauban niini.

“I speculate that not only are they not hiding but, also they may not have been informed of the issuance and enforcement of the warrant,” text ni de la Cerna sa Sun.Star Cebu.

Matod niya nga bisan kon duna nay warrant of arrest, di kini babag sa iyang kliyente sa pag­kwestyon sa pagsalikway sa ilang petisyon.

“They have conferred with their Manila lawyers on the proper course of action. We commend the enforcement of the warrant by the agencies tasked by the court as it is their duty to do so,” dugang niya.(Dugang taho sa Sun.Star Cebu)