4 ka buwan nga masuso 'gi-rape'

UPAT ka buwan nga babayeng masuso nga sa si­nugdan naalaang tiyanak, gituohang gilugos tu­ngod sa samad sa iyang kinatawo.

Ang masuso nakaplagan sa magtiayong tiguwang sa kalubihan sa Brgy. Perrelos, dakbayan sa Carcar kagahapon sa kaadlawon human madunggi ang iyang hilak.

Mga kabanay sa masuso giapil pag-imbestigar sa Carcar police.

Matod ni PO3 Camia Codo, chief sa Women’s Protection Desk (WCPD) sa Carcar Police nga nahinabi sa Superbalita Cebu, nagkanayon nga ang masuso gibilin sa kasagbutan ilawom sa kalubihan.

Mga pipila lang kini ka metros gikan sa balay sa mga ginikanan sa masuso.

Usa ka 60 anyos nga babaye ang nakadungog sa hilak sa masuso ug sa pagsusi, iya kining nakit-an.

Iyang gipukaw ang iyang bana ug ilang gibalik ang nahimutangan sa masuso.

Wa na kiniy diaper ug nagkadugo ang kinatawo.

“Gisugo niya ang iyang bana nga kugosa ang bata kay luoy kaayo nagkadugo. Pero miingon nga dili ko kay basin unyag tiyanak, na paakon ko,” sumala ni Codo base sa asoy sa ginang kaniya.

Sa ilang kahadlok, wa nila kugosa ang masuso, nanangan silang duha ug gipamukaw ang mga sili­ngan aron pahibaw-on sa ilang nakit-an.

Gisusi sa mga silingan ang masuso, hangtod nga usa sa mga apuhan niini niila.

Ilang gipukaw ang mga ginikanan aron susihon kon naa ba sa ilang balay ang ilang anak.

Ang 40-anyos nga inahan nga mamaligyaay og puto uban sa bana nga 44 anyos, natingala kay wa na ang ilang anak.

Pagsusi sa magtiayon, ilang nakompirmar nga ang masuso nga nakaplagan mao ang ilang anak.

Ilang gidali pagdala ang masuso sa Carcar District Hospital ug sa initial nga paghiling sa mga doktor, positibong nasamad ang kinatawo sa bata kay gihilabtan.

Ila kining gipabalhin sa Pink Room sa Vicente Sotto Memorial Medical Center (VSMMC).

Si Codo niingon nga grabe ang samad sa kinatawo sa bata nga tataw nga gihilabtan.

Ang inahan nibutyag nga wa siya makamatikod dihang gikuha gikan sa iyang kiliran ang masuso tu­ngod sa kalapoy sa lawas kay nanuroy siyag puto.

Ang iyang bana sa pikas kwarto nangatug uban sa ilang 3, 5, 6 anyos nga mga bata.

Lain nilang mga anak sa pikas lawak.

Ang bana niingon nga wa sab siya makabantay kay nahinanok sa pagkatulog.

Gilakip nila sa pag-imbestigar ang amahan ug ubang mga maguwang nga lalake pero pulos nanghimakak nga duna silay nahibaw-an.

Gipasabot ni Codo nga wa pa silay suspek samtang nagpadayon ang ilang imbestigasyon diin gila­kip ang ubang mga miyembro sa pamilya.

Matod niya nga hayan laing tawo ang nikuha sa masuso ug wa lang makamatngon ang pamilya sa pagsud sa ilang balay.

Nahibung usab sila kay dunay mga iro ang pamil­ya apan way nipaghot.

Wa nila isalikway nga silingan ra ang nagbuhat niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph