Kanhi star player sa Knicks gidakop, gipagawas sa MSG

NAGHATAG og maayong tilimad-on alang ni Kyle Korver ang saktong do­minasyon nga gipakita sa defending champion Cleveland Cavaliers kaga­hapon batok sa Indiana Pacers, 132-117.

Kini human si Korver, sa unang higayon sukad sa iyang pagbalhin gikan sa Atlanta Hawks, nakapakita na sa iyang kahait pinaagi sa pagpuhag og 29 puntos, walo niini gikan sa three-point area ug milangkat pa og lima ka rebounds.

Nagkinahanglan na lang siya og lima ka triples aron iyang maapsan si Jason Kidd (1,988 triples) alang sa ikapito nga luna sa all-time sa NBA.

Ang iyang 29 puntos nakatupong usab sa nahimo ni Kyrie Irving sa maong duwa.

Midugang og 25 si LeBron James alang sa ikaupat nga sunodsunod nga kadaugan sa Cavaliers ug nagputol usab sa pito ka sunodsunod nga kadaugan sa Pacers.

Si Kevin Love, gawas sa iyang 14 puntos aduna usab kini 10 rebounds.

Nabiyaan og sais puntos sa half­time, ang Cleveland nakakita og gamayng agianan sa third quarter nga maoy ilang gilutsan pinaagi sa pagpuga og 40-18 nga rally.

Sa katapusang 4:23 sa fourth quart­er, ang Pacers mihudlat sa Cava­liers pinaagi sa pagsikit niini ngadto sa 114-107, apan sa panaghugpong og balik sa Cleveland nibalik og inat ang labaw nga giduslitan sat res ni Korver.

Sa laing duwa, midangat pa og siyam ka minutos aron malikayan sa Golden State Warriors ang posibling sunodsunod nga kapildihan. Si Klay Thompson maoy maayo kaayong nakabahug sa dihang giputlag sungay sa Warriors ang Chicago Bulls, 123-92, didto mismo sa ilang korte.

Ang Bulls nga gihamok og injury, nakakombati sa unang bahin sa duwa apan wa kini papuntosa sa Warriors sulod sa kuwatro minutos aron hul­mahon ang double-digit nga labaw ug sa samang higayon naghatod ngadto sa ilang ika-43 nga kadaugan sa 51 ka duwa.

Miduwa ang Bulls nga wala ang ilang mahait nga puwersa nga si Jimmy Butler kinsa nagpaalim pa sa iyang angol sa tuhod ug ingon man si Dwyane Wade nga adunay respiratory infection. Si Thompson mitali og 28 puntos.

Si Kevin Durant, nga igo lang mitali og 10 sa ilang kapildihan sa Sacramento Kings sa niagi nilang duwa, ning higayona mitigom og 22 puntos, midugang og 13 si Steph Curry.