SA matag karon ug unya di nato kapugngan ning pipila ka mga ekspiyerto sa basketball nga motandi nila ni Michael Jordan ug LeBron James.

Dunay pabor ni LeBron James apan sagad gyud adto mohanga ni Jordan.

Kon individual awards ang hisgutan, daghan man tuod ang nakuha ni Jordan pero padayon pang nagsigi og pamupo og mga awards si James.

Lisod gyud hinuon tupngan ang mga nagpunsisok nga mga awards nga nahagdaw ni Jordan.

Unom ka championships, kanapulo mamahimong NBA scoring champion, wa gyud mapildi sa finals, adunay 14 ka MVP awards ug ka 14 usab ka higayon nga nasulod sa All-Star games.

Kini maoy pipila lang ka mga achievements ni Jordan nga lisod siakon.

Mahimong matupngan pero lisod sigurong maapsan. Duna usay mitandi sa ilang attitude o batasan.

Si James daghang mosaway tungod kay may pagka arogante man sab ni.

Dunay higayon nga ma­nginsulto, mangasaba ug daw sa mapahitas-on.

Samtang si Jordan, mapaubsanon ug humble kaayo ngadto sa iyang mga kauban.

Niadtong 1995-96 season, iyang nagiyahan ang Chicago Bulls sa makasaysayong 72-10 nga record sa regular season.

Mao usab kini tuiga nga ilang nalangkat ang ikaupat niyang titulo sa NBA.

Daghan ang nagtuo nga dili na kini mabuak pa, pero sa niaging tuig ang Golden State Warriors maoy mipapas sa maong record human kini makahulma og 73-9 nga baraha sa regular season.

Apan sayang ang maong record sa Warriors ug daw sa nabaliwala lang kay wala lagi sila makampyon sa maong season human mapildi sa Cleveland Cavaliers sa finals.

Ning bag-ohay lang, atol sa panagtigom sa mga team-owners sa NBA, wa kapugong si Jordan ug iyang napikhan ang Golden State kalabot niini.

Bisan tuod og diha ang tag-iya sa Warriors nga si Joe Lacob, ang kanhi Chicago Bulls star nga mao na usab karon ang tag-iya sa Charlotte Hornets mihulagway sa maong hitabo nga maoy pinakasalikwaot sa kasaysayan sa paugnat sa kusog diin ang usa ka team nga haruhay kaayo og dagan sa kalit lang nahagsa bisan pa man sa 3-1 nga bintaha niini sa best-of-seven finals.

Giangkon ni Lacob nga nasakitan ug wa siya kauyon sa patutsada ni Jordan kay mora man og nagpasakit siya og tawo unya mora sab og sagul bugal-bugal.

Pero wa na lang niya kini komprontaha. Kini nahitabo didto sa New York sa usa nila ka dinner.

“Anyway, Michael Jordan — people are drinking and having a good time, and all that — but there was a moment where he said, ‘You know, 73 don’t mean s---t,’” saysay ni Lacob sa usa ka sports radio. Insultador na sab diay ron si Jordan.

Insultador na sab diay ron si Jordan?

(junmigs0622@yahoo.com )