GENERAL SANTOS CITY -- Dili pabor si Mayor Ronnel Rivera nga maapil ang dakbayan sa Bangsamoro Government Region (BGR) isip hulip sa Autonomous Region in Muslim Mindanao (Armm).
Matod ni Mayor Rivera nga kon ang tumong niini aron mapalambo ug mapahugtan pa ang kahapsay ug kalinaw sa dakbayan ug mga kasikbit nga lugar sa Soccsksargen, di na kini kinahanglan tungod aduna na sila'y komprehensibong lakang alang niini.
Nasayran nga sila si South Cotabato first district Representative Pedro Acharon Jr., Sarangani Representative Manny Pacquiao ug South Cotabato second district Representative Ferdinand Hernandez naningkamot nga mawagtang ang opt in provision sa Tripoli Agreement 1976 nga ang mga bag-og mugna nga mga probinsiya, siyudad mahilakip sa BGR.
Una nang milutaw nga naapil sa Tripoli Agreement niadtong 1976 ang South Cotabato, Gensan ug Sarangani Province sa mugnaong BGR pinaagi sa usa ka plebisito.
Gi-angkong usab si Mayor Rivera nga kon adunay balaod niini, igo na lang siyang motuman apan kon wala, siya mismo ang unang mobabag.
Samtang, nanawagan kini sa mga magbabalaod sa Ad Hoc Committee nga dalion ang gidusong Bangsamoro Basic Law tungod kinahanglang tukion ang kinatibuk-ang unod sa maong sugyot balaudnon.
Sa pikas bahin, suportado usab sa mga negosyante sa dakbayan ang pamahayag sa mayor kon diin gikanayon si Engineer Manny Yapuckon nga di na kinahanglan pang maapil ang dakbayan sa BGR.
"Sa una bitaw kahinumdom mo sa gimugna ni Ramos kaniadto nga SPCPD wala man misaler ang gipahigayong plebisito dinhi, mao pod na karon ang mahitabo," asoy pa ni Yapuckon sa Gensan City Chamber of Commerce. (ECB)