BISAN og gibungkag na sa Philippine National Police (PNP) ang Anti-Illegal Drugs Group (AIDG) sa "war on drugs" sa administrasyon, wala gihapon nahunong ang operasyon batok sa ilegal nga druga.

Ang AIDG gibungkag human sa kamatayon sa Koreanong negusyante nga giingong hinimoan sa mga salbahis nga pulis.

Padayon gihapon ang operasyon batok druga, apan ning higayona, gisangon na ngadto sa Philippine Drug Enforcement Agency (PDEA).

Ang PDEA maoy mangulo sa paglusad og mga anti-drug operations, ubanan sa pipila ka mga otorisadong mga sakop sa militar.

Gani sukad nga nabungkag ang AIDG, sunod-sunod nang mga operasyon ang gihimo sa PDEA nga miresulta sa pagkadakop sa pipila ka mga tawong nalambigit ug pagkasakmit sa mga druga.

Lisud og pasagdan na lang ang nasugdan nang kampanya batok druga. Kay imbis nakibhangan na ang suliran, basin unya og mosamot kon ihunong ang mga operasyon batok niini.

Mas maayong ipadayon kini, taliwala sa daghang mga hagit ug batikos nga nadawat ang administrasyon ni Pangulong Rodrigo Duterte ug sa Philippine National Police.

Di angay pasagdan sa administrasyon mga nalambigit sa ilegal nga druga nga magmaya ug magpadayon pagpakuyanap niini nga maoy mopatay sa kaugmaon sa mga kabataan.