SI MAYOR Sara Duterte niadtong Lunes nagmugna og committee nga magseguro nga ang lokal nga gobyerno epektibong makaimplementar sa nindot ug mabulukon nga aktibidad sa 80th Araw ng Davao.

Pinaagi sa Executive Order No. 03, si Mayor Sara nagmando sa pagmugna sa Executive Committee.

Isip mayor, si Duterte maoy mangulo, apan sa iyang pagpalta, tungod sa delikado nga pagsabak, pangulohan kini ni City Administrator, Atty. Zuleika Lopez.

Si Renato Gatchalian, tag-iya sa Saging Repablik ug Presidente sa Davao Tourism Association (Data), ning tuiga maoy Co-Chair sa private sector.

Si Vice Mayor Paolo Duterte ginganlan nga vice chairperson samtang ang mga miyembro naglakip ni City Mayor’s Office Chief of Staff Atty. Raul Nadela Jr., City Tourism Officer Regina Rose Tecson, Asst. City Administrator for Administration Atty. Tristan Dwight Domingo, City Accountant Vingelina Bajan ug Councilor Al Ryan Alejandre.

Ang Execom gitahasan nga moplano ug magseguro sa hapsay nga koordinasyon sa mga programa ug aktibidad ning tuiga nga selebrasyon, nga nagdasig sa daghang partisipasyon gikan sa pribadong sektor nga organisasyon.

Usab gitahasan nga mangita og paagi masuportahan ang epektibo nga implementasyon sa mga giplano nga aktibidad.

Sama sa milabay nga Araw ng Davao nga selebrasyon, ang pundo ning tuiga gikan sa private sector sponsorships uban sa gigahin gikan sa City Tourism Office ug City Government of Davao.

Ang mayor nagsulti nga siya buot nga ang kalihukan ipromotar sa lokal ug internasyunal pinaagi sa media, aron daghan ang mga mobisita nga turista. (CIO)