DAVAO DEL SUR -- Gipasalig sa mga sakop sa Mt. Alip Sub-Regional Operations Command sa New People's Army (NPA) nga anaa sa maayong kahimtang ang duha ka mga sundalong ilang gidagit sa Barangay Telefas, lungsod sa Columbio, probinsiya sa Sultan Kudarat.

Giangkon sa NPA-Far South Mindanao Region (FSMR) nga sila maoy nidagit sa duha ka mga sakop sa 39th Infantry Battalion (IB) nga gitawag nila og prisoners of war (POWs) samtang nagpahigayon og Peace and Development Outreach Program (PDOP), alas 7 sa buntag niadtong Pebrero 2.

Sa pahayag nga gipadala sa SunStar SuperBalita ni Ka Dencio Madrigal, tigpamaba sa Valentin Palamine Command sa NPA-FSMR, nagbutyag nga anaa sa ilang kustodiya sila si Sergeant Solaiman Calocop, 46, ug Private First Class Samuel Garay, 28, nga mga sakop sa 39th IB.

Nasayran nga nakabase ang mga sundalo sa Barangay Datal Blao, Columbio.

Matud ni Madrigal nga giayo nila pagtagad ang duha ka POW subay sa nalatid sa Comprehensive Agreement on Respect for Human Rights and International Humanitarian Law (CARHRIHL) ug balaod sa NPA.

Apan gitataw ni Madrigal nga sila si Calocop ug Garay, gipailawom sa imbestigasyon human giingong nalambigit sa mga kalapasan sa katawhan ug mga krimeng nahimo batok sa rebolusyonaryong kalihukan.

Giklaro niini ang pagdagit sa duha ka sundalo kabahin sa ilang active defense action batok sa 39th IB nga responsible sa massive counter-revolutionary operations ug mga pag-atake sa nagkadaiyang dapit sa probinsya sa North Cotabato.

Samtang, alang ni Lieutenant Colonel Harold Argamosa, commanding officer sa 39th IB, pulos propaganda lamang ang gihimo sa mga teroristang komunista kay bisan niadtong panahon sa hinabing kalinaw ug ceasefire aktibong milihok ang mga NPA sa paghimo og mga ekstorsyon sa mga negusyante ug recruitment aron madugangan ang ilang puwersa. (Orlando B. Dinoy)