TULO ka mga tawo ang nasikop sa kapulisan tungod sa ilegal nga sabong alas 4:30 sa hapon niadtong Miyerkules, Pebrero 8, sa Purok 10, Doña Salud, Barangay Sasa, dakbayan sa Davao.

Nasikop mao sila Louie, 42, minyo, nagpuyo sa Doña Salud; Jonathan, 36, residente sa Barangay Pampanga; ug George, 35, residente sa San Miguel, Barangay Panacan.

Base sa spot report sa Investigation and Detection Management Branch sa Davao City Police Office, si Louie nagsilbi nga tigpasiugda sa ilegal nga sabong samtang sila Jonathan ug George nagsilbi nga mga mamustahay.

Nakuha gikan kang kang Louie ang salapi nga P11,480 samtang manok pangsabong sab ang nakuha gikan sa duha ka mga dinakpan.

Ang tulo gikustodiya sa kapulisan samtang gihikay ang kaso batok kanila. (AD)