USA ka fish vendor ang nasikop human nasuta nga tinuod ang impormasyon gikan sa concerned citizen sa Governor Generoso, Davao Oriental, nga namaligya siya og shabu.
Ang pagkasikop sa suspek ala 1:40 sa kaadlawon niadtong miaging adlaw sa Bonifacio Street kanto Don Mariano Marcos Street, Mati City, Davao Oriental.
Ang suspek giilang si Larry Damole, alyas Larry, 38, minyo ug residente sa Purok 8, Empog Lavigan, Governor Generoso, Davao Oriental.
Si Damole gisikop human gitunol ang shabu nga nagkantidad og P1,000 ngadto sa operatiba sa PDEA.
Mga nakuhang shabu ug drug paraphernalia gihimo karong ebidensiya sa kasong paglapas sa Republic Act 9165 kung Comprehensive Dangerous Drugs Act of 2002. (AD)