8 ka NPA misurender

GITAHO sa 10th Infantry Division, Philippine Army nga duna nay walo ka mga rebeldeng komunista mibalik sa sabakan sa balaod sukad Pebrero 1, human ang kagamhanan milibkas sa ceasefire tali sa komunista.

Ang tigpamaba sa 10th Infantry Division nga si Captain Rhyan Batchar nag-ila sa walo ka mga rebelde sa mga alyas alang sa ilang seguridad: Joni, Mike, Ranil, Tenen, Jimboy, Francis, Robert ug Rustom, tanan naglihok sa Davao Region.

Gikanayon ni Batchar nga si Joni misurender ngadto sa 67th Infantry Battalion human sa engkuwentro tali sa tropa sa kagamhanan ug sa mga rebelde sa Manay sa Davao Oriental niadtong Pebrero 1; samtang sila si Mike, Ranil, Tenen, Jimboy, ug Francis mitahan niadtong Pebrero 7.

Sila si Robert ug Rustom, kinsa kanhi mga miyembro sa NPA Guerilla Front 71, mitahan ngadto sa 73rd Infantry Battalion sa Davao Occidental niadtong Pebrero 6 tungod sa kalisud ug kagutom nga nasinatian samtang naa pa sa kalihukan, matud ni Batchar.

Dugang ni Batchar nga ang opensiba nga gilusad sa division miresulta og duha ka panag-engkuwentro, walo ka mga rebelde kinsa mitahan ngadto sa mga sundalo, pagkadiskobre sa lima ka mga kampo ug pagkasakmit sa mga improvised explosive devices.

Si 10th Infantry Division commander Major General Rafael Valencia, sa usa ka sinulat nga pamahayag, nag-awhag sa tanang mga miyembro sa NPA nga mobalik ngadto sa sabakan sa balaod.

Iya sab nga gihangyo ang komunidad nga dili mosuporta sa NPA.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph