NAGPAKITANG gilas ang usa ka batan-ong Filipino-American taekwondo fighter sa mga local inter-state ug national championships sa Estados Unidos.
Ang 13-anyos nga Elizann Emata-Blank, kinsang inahan nga si Liza, usa ka lumad sa munisipyo sa Tagoloan, ang nagpahugyaw sa iyang mga kampanya sa USA.
Nahulagway si Blank bagohay lang sa The Filipino Channel o TFC, usa ka network sa ABS-CBN nga nakatotok sa mga Pinoy sa abroad.
Nahulagway didto ang iyang dakong dungog paglangkat og bulawang medalya sa USA Taekwondo Championships niadtong usa ka summer sa 2015 didto sa Houston, Texas. Sa susamang tuig, naka-gold sab siya sa Las Vegas Open.
Niaging tuig, nilangkat na sab siya og gold sa California State Taekwondo Championships.
Mismo ang iyang trinor nga si George Arsenal, kinsa naka-basi na didto sa US, ang nagkapot kang Blank sa trining.
Si Arsenal usa ka kanhi trinor sa sikat nga Kagayhaan Dojang Taekwondo Gym bago pa man nagkaugalingon sa iyang Arsenal Taekwondo Center.
Saysay niya nga paspas ang tubo ug kalamboan ni Blank sa iyang fighting weight sa 48 kilos cadets category.
"Tagoloanon na siya ug didto na sa US nagdako," ingon ni Arsenal.
Dugang pa niya nga gipangita siya ni Blank aron magpaensayo kang Arsenal niadtong 2015.
Naagbat ni Blank ang pipila ka mga nationals gikan sa Russia, Poland, Mexico ug Canada sa iyang mga away didto.