SA TINGUHA nga makatabang sa mga kabatan-onan ning tuiga sa pag-abli sa klase, ang Sun.Star Davao Publishing Inc. migahin og pundong salapi alang sa mga kabatan-onang lumad nga nagtungha ning school year 2015-2016.
Ang kompanya, gipangulohan ni General Manager Tessie A. Paña, nakahukom nga i-prayoridad ang mga bata nga nagtungha sa Tibi-tibi Elementary School nga nahimutang sa Sitio Salawaw, Barangay Sto. Niño, Talaingod, Davao del Norte.
Sa wa pa mi-arangkada ang mga opisyales sa kompanya, nga gilangkuban nila editor-in-chief Stella A. Estremera, newsroom supervisor Donna C. Cuyos, Human Resource head Vic Purgatorio, circulation supervisor John Darwin Kapau-an, credit, circulation supervisor Leo Ocot, King Rodriguez, ug ning tigsuwat paingon sa tunghaan niadtong Miyerkules, malipayong giandam sa mga empleyado ang 600 ka mga bags nga dunay mga school supplies sama sa papel, notebook, lapis, ballpen, ug uban pa.
Matod ni Paña nga ang pagpanghatag og school supplies usa ka tinuig nga aktibidad subay sa Corporate Social Responsibility (CSR) sa kompanya nga nagmantala sa Sun.Star Davao (sinuwat sa English) ug Sun.Star Davao SuperBalita (sinuwat sa Cebuano) nga nagsirkular sa Davao Region ug kasikbit nga mga dapit.
Sayo sa buntag, Miyerkules, mibiyahe ang grupo paingon sa Tibi-tibi Elementary School diin malipayong nagpaabot ang mga bata nga nagtungha sa Kindergarten uban sa ilang mga inahan.
Sa among pag-abot sa tunghaan, madasigon kaming gitabangan sa mga kabataan ug mga ginikanan nga ipahiluna ang dalang mga school supplies.
Pipila ka minuto ang milabay, human nakapahiluna, gisugdan dayon ang hamubo nga programa pinaagi sa pag-ampo dayon gisundan sa lumadnong sayaw sa mga kabataan, ug gisunod ang pagpang-apud-apod sa mga school supplies ug lamian nga arroz caldo gikan ni Davao City Mayor Rodrigo Duterte.
"Dako kaayo ang among kalipay nga inyong gipili ang among school nga beneficiary," sulti ni Reynaly Santos, school principal, nga maoy nangulo sa 13 ka mga magtutudlo sa 655 ka mga estudyante.
Mga estudyante nagpuyo sa mga hilit nga sityo sa Barangay Sto. Niño diin mokabat sa P100 ang plite sa motorsiklo.
"Nagpasalamat gyud mi nga naa moy gihatag nga school supplies kay kadaghanan nila, wa pa gyud mi-eskwela kay wala pay mga gamit. Pero, amo lang gyud gihangyo ang ilang mga ginikanan nga paeskwelahon karon kay naay ipanghatag nga school supplies," dugang sulti ni Santos.
Dihang gipangutana kung base sa ilang eksperyensiya, makahuman ba ang mga bata sa ilang pag-eskwela, si Santos nagsulti nga halos katunga ang di makagraduwar sa grade six.
"Ang uban nila na-involve sa child labor. Sayo silang patrabahuon sa ilang ginikanan. Ang uban sab, sayo kaayo magminyo," dugang sa principal.
Ang Tibi-Tibi Elementary School natukod niadtong 1976 sa silingang sitio Tibi-tibi apan tungod sa pangayaw (panimalos sa mga lumad nga bisan kinsa nga masugatan ilang patyon) niadtong 1994, napugos ang school head sa pagbalhin sa luwas nga lugar dala ang mga school records aron makatungha ang mga batang lumad.
Ang Sun.Star nagpasalamat sab sa mga donors: Petite Porras-Veneracion ug Yveete, Chia, ug Cholo Francisco-Tolentino.