BAHIN ang baruganan sa pipila ka mga konseho sa dakbayan sa sugyot sa usa ka konsehal nga angayan na nga adunay casino sa Cagayan de Oro.

Gibutyag ni Goerge Goking, kinsa chairman sa trade and commerce sa konseho, nga sa sige niya og tambong sa mga miting kauban ang mga dagkong investor adunay bout moaplay nga motukod og casino sa dakbayan.

Hinuon gipasabot niini nga kini sabutan pa ug gikinahanglan ang pagtugot sa publiko. Daw kung bout sa katawhan nga dili gyod tukoron iya kining suportahan.

Sa iyang bahin sab ni Konsehal Eric Salcedo, gibutyag niini nga hugot gyod kayo iyang pagsupak niini tungod kay daw mas modaghan ang krimen, mosamot ang trapiko ug magkalisod ang samot naglisod ug hinungdan sa makaguba sa pamilya kung adunay casino dinhi sa dakbayan.

Gibutyag niini nga malamboun ang dakbayan taliwala nga walay casino tungod kay daghan ang mibubo og puhunan sa dapit.

“Dili man ta magkinahanglan anang casino o pasugalan dinhi sa atong siyudad kay malamboun naman kita,” butyag niini ug miingon nga gihatag na sa administrasyon ni Mayor Moreno ang mga nag-unang pangihanglan sa katawhan aron komportable ang pagpamuyo.

Kini sama sa gipangtukod nga mga tunghaan ug pag-upgrade sa tambalanan sa dakbayan.

Samtang pulso sa usa ka Kagay-anon nga Marilou Sereña sa pangutana kung uyon ba kining adunay casino sa dakbayan.

"Para sa akoa, okey lang kay mga sapian man sab gapanulod diha ug kung sugarol gyod ka, mosulod man gyod ka. Depende raman na sa tao kung makapausab ba nila." matud ni Sereña. (SVB)