POSIBLENG sayop ang impormasyon nga mikatap sa mga mensahe nga moabot sa cellphone kalabot sa giingong pagpangatang sa gitouhang mga sakop sa New People's Army (NPA) sa Barangay Bulahan, lungsod sa Claveria, Misamis Oriental.
Gika-report nga mokabat sa 30 ka mga armadong gitouhang mga sakop sa NPA sa Sitio Lanara ang miatang sa dalan ug gipangpara ang bisan kinsa nga molabay sa lugar.
Giingong gipangsusi ang sulod sa bag ug gipangkuha ang mga cellphone sa kinsa man nga maatangan.
Gibutyag sa tigpamaba sa 4th Infantry Division Philippine Army nga si Captain Joe Patrick Martinez nga anaa ang ilang sakop nga 3Oth Infantry Battalion sa dapit nga nakabantay ug naghatag og seguridad sa kadalanan.
Giklaro nga wala silay namatikdan nga adunay mga NPA nga nibabag sa dapit.
Bisan mismo ang kapitan sa maong barangay, namahayag nga wala kini kamatouran ug daw kung kinsa man ang nangulo sa pagpakatag sa sayop nga mensahe ang kinanglan managot niini.
Daw ang maong mensahe naghatag og kahadlok sa pipila ka mga residente sa dapit.