TULO ka mga suspetsadong "large-scale" illegal recruiters ang nasikop atol sa entrapment operation sa National Bureau of Investigation (NBI)-Davao niadtong Miyerkules sa gabii.
Ang mga suspek giilang sila Louisa Paloma, Paz Caalim, ug Catherine Alacapa, pulos nagpuyo sa Davao City.
Si NBI-Davao spokesperson lawyer Arcelito Albao misulti nga ang mga suspek giila sa Philippine Overseas Employment Administration (POEA) nga nagrekrut og 10,000 ka tawo sukad sa pagsugod sa ilang operasyon niadtong Disyembre sa miaging tuig.
Si Albao nagkanayon nga ang grupo sa ilegal recruiters naglihok uban sa mga suspek nga gikonsidera nga utok sa operasyon tungod kay ang salapi nga ilang makuha sa mga biktima direktang gideposito sa ilang mga bank accounts.
Matod ni Albao, ang mga suspek naglihok sa tibuok Mindanao diin pipila sa ilang mga biktima gikan sa Cagayan, Bukidnon, Compostela Valley, ug Calinan.
Si Albao misulti nga ang mga nagreklamo gisaaran sa mga suspek nga makatrabaho sa Japan, Korea, Italy, Hungary, ug Vietnam diin sila makapili og trabaho isip hotel staff sa Hilton Hotel nga dunay $900 nga sweldo matag buwan o isip dairy farmer sa Pirin Company nga dunay P73,000 nga sweldo matag buwan.
Dugang niya nga ang mga kompanya wa makaila sa mga suspek.
Si Albao misulti sab nga ilawom sa direct-hiring scheme, mokolekta sila og P8,000 o P15,000 isip inisyal nga rekisito sa ilang application ug ingnon nga moadto sa Manila aron maghulat sa ilang papeles.
Suma sa opisyal, naniid na sila sa operasyon sa grupo sukad niadtong Disyembre 2014 human ang POEA nagsumite sa ilang report batok sa mga suspek.
"Nag-try mig entrapment kadaghan na pero kani sila lisud ma-entrap," suma ni Albao.
Nasayran nga dunay 100 ka tawo ang narekrut sa mga suspek nga natanggong karon sa Manila.
Dugang pa, dunay 20 ka mga complainants nga narekrut gikan Miyerkules sa gabii ang miduso sa kasong large scale illegal recruitment ug estafa batok sa mga suspek pinaagi sa summary inquest proceeding sa City Prosecutor's Office.