MAO na kini ang ginahulatan sa tanan diin sugdan karong adlawa ang best-of-seven NBA Finals sa Golden State Warriors ug Cleveland Cavaliers.
Mga komentarista sa NBA gikan sa telebisyon, NBA.com, ug sa pamantalaan halos napagawas nga lamang ang Warriors batok sa Cavaliers.
Kini tungod nga nadagsaan og mga injury ang Cavaliers gikan kang Kevin Love nga gipapahulay kay upat paingon sa unom pa ka bulan maulian samtang makadula man tuod si Kyrie Irving apan dili pa sa iyang 100 porsyento nga linihokan.
Basi sa taho, padayon pa siya gitambalan ug nieskapo siya sa mga ensayo.
Ang naa sa baraha karon sa Cavs nga dako kaayo og gamit nga moabag ni Lebron James mao sila si Matthew Dellavedova, JR Smith, Iman Shumert ug Tristan Thompson.
Dili ni mahimo tanan ni Lebron, nga tuod iya kining ikalima nga appearance sa NBA Finals.
Sa pikas sab, buo tanan line-up sa Warriors diin kompirmado makadula si Klay Thompson gikan nga naigo siya sa tuhod ni Trevor Ariza sa Houston Rockets atol sa ilang Game 5 sa NBA Western Conference Finals.
Gipangulohan sab kini sa ilang most valuable player nga si Stephen Curry.
Gawas nga wala kaayo sila naigo sa injury, motilaw sila og homecourt advantage sa unang duha nga dula.