NAGTINGKAGOL sa prisohan sa Police Station 3 sa Agora ang usa ka suspetsado nga tigpayuhot sa gituohang' marijuana human nasikop niadtong Miyerkules sa gabii sa Centro Kulambog, Lapasan, dakbayan sa Cagayan de Oro.

Nasapon sa drug bust si Romy Dae Camporedendo, minyo, ug lumulupyo sa Bayugan-1, Agusan del Sur.

Subay sa report sa kapolisan nga nagpahigayon og drug bust ang tinugyanan sa kapolisan sa pagpangulo ni Police Chief Inspector Ernesto Daing, Station Commander sa PS3 human sa taho sa operatiba sa kapolisan sa ilang buhatan hinungdan na usab sa malampusong pagkasikop sa maong suspetsado.

Sa pakighinabi sa Sun.Star Superbalita ngadto sa suspetsado gipanghimakak niini ang maong alegasyon ug gikabutyag niini nga wala kini kasayoran nga marijuana matud pa ang ilang gipick-up sa Malaybalay, Bukidnon.

Giingong igo lang kini nga mituman sa tag-iya sa panimalay nga ila untang katulgan niadtong gabhiona.

Apan gi-angkon sa suspetsado nga nag-gamit kini sa ginadili nga druga dugay na nga panahon ug hugot niini nga gipanghimakak nga nagpayuhot.

Nasayran usab nga nabilanggo na kini ikaduha ka higayon sa managlahing kaso.

Nakuha gikan sa posisyon sa suspetsado sulod sa backpack niini ang tulo ka bugkos sa uga nga dahon sa marijuana ug laing usa ka supot sa mao gihapong ginadili nga marijuana human napalitan.

Gibana-bana nga mokabat sa kapin duha ka kilo sa uga nga dahon sa marijuana ang nakompiska gikan sa maong suspetsado diin gibana-bana usab nga nagkantidad og P9 mil.

Sa pagsulat niini nga balita, ang maong suspetsado ang nagtingkagol na sa nahisgutang buhatan, samtang ang mga ebidensiya gidala na sa PNP Crime laboratory Northern Mindanao alang sa eksaminasiyon.