Dear Noy Kulas,
Ako si Dikoy, 36 anyos. Minyo na ko pero kining akong problema di ni akoa kay sa ako ning manghod nga taguon lang nato sa ngan nga Vic.
Duna siyay uyab nga ginganlan og Annie. Mga tulo ka tuig sila nga nagkauyab ug close na kaayo ang babaye sa among pamilya. Hasta ang akong manghod suod na nila. Ang problema, Noy, nagsugod dihang ni-abroad si Annie. Maayo pa to ang ilang communication until nga nagka wa nay klaro. Nisangko sa buwag nilang duha.
Nasakitan og maayo si Vic kay wa siya magdahom nga ang ilang three years nga relasyon mosangko sa buwag. Naluoy ko sa akong manghod kay affected kaayo. Niundang siya sa trabaho ug naa na lang pirme sa balay, nagkulong sa iyang kwarto. Gitambagan na siya namo ug sa among parents pero di kuno niya kaya mawala si Annie.
Unsa may among buhaton aron siya maulian? Nabalaka mi kay tagsa na lang siya magtingog tingog ug pirme layo ang panan-aw. Naa kay ikatambag unsay among buhaton?
DIKOY
Dikoy,
Ang labing maayo ninyong buhaton mao ang pagpabakasyon sa imong igsuon kauban mong iyang pamilya. Gahini ninyo og panahon kay ang iyang gibuhat karon di maayo nga tilimad-on. Ang tawo nga mo-withdraw na gikan sa ubang tawo dunay dakong puruhan nga makahuna-huna og dautan kay wa siyay kapahungawan sa iyang kaguol ug kasakit nga gibati. Mao nang dunay uban nga naghikog.
Bisan naa siya sud sa kwarto sa inyong balay, pagasusiha ug estoryahe kanunay. Kon kinsa ang iyang suod nga mga higala, paduawa sa iyaha aron duna siyay kaestoryahan. Kay basin pa, ang tanang kasakit nga iyang gibati mapagawas aron kini mogaan gaan.
Dasiga siya ninyo sa pagsuroysuroy ug pag-apil og mga sports. Paliti og mga libro unsaon sa pag getover. Ipakita ninyo nga kon gibiyaan siya ni Annie, naa mong daghan pa nga nagmahal kaniya. Usa sa labing maayo ang pagdala kaniya sa pagsimba kay dako kini og matabang sa iyang recovery.
Pipila lang kini ka butang nga inyong mahimo apan makatabang na kini og maayo kaniya.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)