GIKUMPIRMAR ni Mayor Oscar Moreno nga mudagan siya og balik isip mayor sa Cagayan de Oro City sa umaabot nga eleksyon sa tuig 2016.

Kini ang iyang gibutyag atubangan sa mga sakop sa prensa atol sa usa ka kalihokan sa Macasandig ug gibutyag niini nga kumpirmadong magpapapili siya og balik pagka-mayor.

Apan giklaro niini nga layo pa kaayo ang eleksyon ug gipokos usa niya ning panahona mao ang pagserbisyo sa katawhan.

Samtang wala'y gikumpirmar si Cagayan de Oro 2nd District Representative Rufus Rodriguez kung unsay iyang daganan sa umaabot nga eleksyon.

Gibutyag niini nga sayo pa kaayo magdesisyon kung unsay iyang daganan labina nga iyang pokos usab ning panahona mao ang pagpanerbisyo usa sa katawhan.

Migawas ang report nga magpapili kini isip Mayor sa siyudad diin mahimong kaatbang ni Moreno labina nga katapusan na niining termino ning panahona apan gibutyag niini nga sayo pa kaayo kini nga tubagon.

Gi-angkon niini nga anaa sa iyang hunahuna ang magpapili sa taas nga posisyon apan gibutyag niini nga dili tiaw ang kadako sa gasto hinungdan nga magduha duha kini sa taas nga posisyon sama sa pagpapili pagka Senador.

Samtang gihungihong nga gawas nila Moreno ug Rodriguez nga magpapili isip mayor sa siyudad mobalik sa pagpapili si kanhi mayor Dongkoy Emano ug Cagayan de Oro 1st District Representative Rolando Uy.