TAGBILARAN CITY - May pundo gihapon nga mapangayo-an ang mga kalungsuran gikan sa nasudnong kagamhanan, ug kana mao ang Assistance to Disadvantaged Municipalities (ADM) program.
Kini maoy gibutyag ni Department of Interior and Local Government (DILG) Secretary Michael Sueño, agi usab og tubag sa pakisayud sa presidente sa League of Municipalities sa Bohol nga si Clarin Mayor Allen Ray Piezas.
Gipasabut ni Sueno nga ang DILG may programang ADM hulip sa Bottom-Up Budgeting (BuB) sa milabay nga administrasyon.
Hinuon, lahi sa BuB, ang ADM naglantaw lamang niadtong mga nagkinahanglan sa tabang apan ang sa BuB giapil bisan kadtong mga lungsod nga tataw nga may kaya na.
Ug kon ang BuB nagtutok aron gamhan ang katawhan nga manginlabut, ang ADM mag-abag sa LGUs sa pagpalig-on sa pagpadangat sa batakang serbisyo nagdto sa ilang katawhan.
Segun sa DILG, ang ADM nagasukad sa panginahanglan nga maghatag og lugway sa mga kalungsuran nga magamit ang ilang Internal Revenue Allotment (IRA) segun sa ilang gilaraw ug pundohan hinuon ang ubang natumbok nga mga proyekto aron pagaanon na ang pagsalig sa IRA.
Mao nga inay ang katawhan ang lakip sa magpili sa ilang mga proyekto, ang mga mayor na ang magduso sa mga proyekto subay sa kasamtangang natumbok sa Municipal Development Plans.
Ang mga proyekto nga kapundohan sa ADM, dugang sa DILG nagalangkub sa lima ka batakang imprastraktura nga labing gikinahanglan sa lungsod: kadalanan, limpyong tubig mainom, hiklinanan kon may katalagman o evacuation centers, pasilidad sa kasanihan o sanitation facilities, ug small water impounding systems alang sa panguma.
Hinuon, tungod kay gisubay gihapon sa DILG ang protocol ni Robredo kinsa unang nagpauso sa BUB, ang ADM mongadto lamang sa mga kalungsuran nga nakapasar sa standards sa good financial housekeeping nga parte sa of Good Local Governance (SGLG).
Di usab tanan sa 1,373 gikan sa kinatibuk-ang 1,489 ka kalungsuran sa nasud ang tabangan sa programa nga una nang natumbok nga ‘disadvantaged’, tungod kay ang ADM nagtan-aw sa kabaga sa kawad-on sa usa ka lugar ug di lamang base sa ubos nga kita sa lungsod.
Matud ni Sueño ngadto sa mga mayor sa Bohol, anaa sa P18 bilyones nga portfolio ang magamit sa ADM nga mahimong mokabat usab sa P25 milyones nagdto sa P30 milyones ang mahimong mahuka sa lungsod pinaagi sa proyekto.
Si Sueño mibisita sa Bohol isip pinasidunggang dinapit sa Liga ng Mga Barangay sa Bohol nga naghimo sa ilang 3 ka adlaw nga Congress niadtong unang semana sa Pebrero. (RAC/PIA-7/Bohol)