Langyaw wa makatunga human mi-dive sa dagat

ORMOC CITY, Leyte - Usa ka langyaw ang wa na makatunga gikan sa iyang pag-dive sa kadagatan sakop sa Barangay Napantao, San Francisco, Southern Leyte.

Padayun ang gihimong search and rescue operation sa Philippine Coast Guard - Eastern Visayas (PCG-EV) sa langyaw nga si Max Quinn, 38, American national.

Matod ni Commander Lawrence Roque, spokesperson sa PCG-EV, niadtong Sabado sa buntag pa nawala si Quinn.

Base sa report sa PCG, kauban ni Quinn sa pag-dive ang French national nga si Jeofrey Mayer, 27.

Pito ka metros nga gilawmon ang gitugot nga ilang sawmon.

Sa dihang naabot na sa duha ang pito ka metros nga gilawmon, misensyas si Quinn kang Mayer nga mopailawom pa sila.

Wa mosugot si Mayer busa si Quinn nalang ang mipadayun.

Miuna pagtunga si Mayer ug naalarma kini human sa pipila ka oras ang nakalabay nga wa gihapon motunga ang kauban.

Gisugilon ni Roque nga kantilado ang lugar nga gisawman sa duha.

Ang dive site adunay 90 metros nga gilawmon.

Gitaho ni Mayer sa staff sa Peter’s Dive Resort ang hitabo ug ang taga resort na ang mikontak sa PCG.

Gilusad sa PCG ug mga divers sa resort ang search and rescue operation apan wa nila makit-i si Quinn.

Dugang ni Roque, nangayo na sila og tabang sa ilang headquarters aron mapadad-an sila og technical divers.

Gialerto na usab sa PCG ang nagkadaiyang lugar sa pamasin nga makit-an si Quinn kinsa nagsul-ob og yellow fins ug blue nga face mask.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph