NAKATAMBONG pa sa kasal sa iyang anak si kanhi Aloguinsan Mayor Cynthia Moreno, kinsa lakip sa laing pito ka mga opisyal nga gipangita sa kapulisan human lutsi og warrant of arrest nga giisyu sa Sandiganbayan.

Sa pakisusi ning mantalaan kagahapon sa pa­nimalay sa kanhi mayor, nibiya siya alas 11 sa bun­tag kagahapon alang sa kasal sa iyang anak nga si Christian kagaha­pon sa Cebu City.

Kuyog niya iyang bana nga si Mayor Chonse.

Niadto pang Enero 25 nagsugod sa pagpangita ang kapulisan sa Aloguinsan. Apan sulod sa 10 ka adlaw nga gihatag ka­nila, wala sila makadakop bi­san usa niini.

Ilang gibalik ang warrant base sa mando sa Sandiganbayan.

Matod ni SPO2 Carmelito Unabia Ornales, deputy ug chief intelligence sa Aloguinsan Police nga nakadawat sila sa warrant gikan sa Sandiganbayan pinaagi sa post office niadto pa’ng Enero.

Gisugdan dayon nila ang pagpangita sa mga subject sa warrant.

Lakip sa ilang gipangita ang mga aktibo pa sa serbisyo nga sila si Municipal Budget Officer No­nela Villegas, Municipal Agriculture Officer Marilyn Flordeliza, Municipal Assessor John Lim, Municipal Engineer Orven Nengasca, ug ang kaniadto utility worker nga si Emilia Luz Celis kinsa karon usa na ka konsehal.

Retirado na si kaniadto Municipal Civil Registrar Pepito Manguilimotan ug wa na sa serbisyo si kanhi utility worker Gertrudes Ababon.

Dugang ni Ornales nga di nila mapusasan ang mga subject kon wa ang warrant dungan sa pag-ingon nga wala na usab igkita ang mga subject.

Usa ka empleyado sa municipal hall kinsa nahinabi sa Superbalita Cebu kagahapon apan di magpahingan, nagkanayon nga procedural lapses ang nahitabo ug dugay na usab kaayo kini.

Dungan sa pag-ingon nga “siya (Cythia) mao’y naka-boom sa among eco-topurism.”

Kalapasan sa Republic Act 3019 kun ang Anti-Graft and Corrupt Practices Act ang gipahamtang sa maong mga opisyal tungod sa wa pagpaubos sa public bidding sa P1.9 milyones nga aluminum cladding sa ilang kasamtangan nga municipal hall.

“Di mi magdugay kon di sila maayo,” mao kini ang gibutyag sa lima na ka tuig nga katabang sa mga Moreno nga si Vicky Barangga kinsa niatubang ning mantalaan sa panimalay kagahapon.

Si Reynaldo Trongcao, 39, kinsa lumad sa Barangay Tabugon nisaysay usab nga nitabang si Moreno kaniya dihang na­kabsan sa kinabuhi iyang asawa dihang pito ka buwan nga mabdos duha ka tuig na ang nakalabay.

Matod ni Trongcao nga kadtong mayor pa kini, nihatag kini kaniya og burial assistance.

Pipila ka metros sa panimalay sa mga Moreno ang kan-anan ni Alfred Garing, 67, kinsa nihulagway usab nga di mamahimo nga malambuon ang Aloguinsan kon di tungod sa mga Moreno.

Nagkanayon usab siya nga biktima sa pamolitika ang mga opisyal nga gikombikto tungod kay sa mga nilabay nga eleksyon, mao na kini ang ilabay sa ilang kaatbang.