WA makasulod sa barangay Hall sa Ermita si Atty. Winefredo Orcullo kinsa maoy gitudlo ni Ma­yor Tomas Osmeña nga caretaker sa barangay human gisuspenso ang ta­nang barangay officials.

Pasado alas 10 sa buntag, nibisita sila si Emma Calvo, officer in-charge sa City DILG, SPO1 Adonis Dumpit kuyog ni Orcullo sa Ermita aron tapukon ang mga kawani ug say­ran gikan kanila unsay i­­lang mga nanag-unang pro­blema sa barangay.

Apan pag-abot nila sa barangay hall, gikandaduhan na usab ang pultahan ug matod pa sa barangay secretary nga ang nagdala sa yawe tua sa korte kay nikuyog sa gi-hearing.

Matod ni Calvo nga sa ilang pag-abot, gikandado na ang barangay hall ug wa sila namugos nga makasulod sanglit mao sab kini ang direktiba ni Department of Interior and Local Govern­ment (DILG) Director Rene Burdeus sa DILG-7.

Gitug-an niya nga mohi­mo sila og report ug iduso sa ilang buhatan sa region 7.

Samtang giduaw dayon ni Acting Mayor Edgardo Labella pasado alas 11 sa buntag ang Ermita dihang iyang nasayran nga sirado ang barangay hall.