GISIKOP kagahapon sa kapulisan ang gikatahapang rapist sa upat ka buwan nga masuso sa dakbayan sa Carcar.
Hinuon, ang nahuptang mga ebidensya sa Carcar police pulos pa circumstantial.
Mga kainom ni Jonathan “Jojo” Marfe, 40, way trabaho, giingong adik, nagduda kaniya kay giingong nag-ilis og senina nga iyang gisul-ob atol sa hitabo.
Ikaduha, ang napalgang pat-ak sa dugo sa usa ka karton sa iyang higdaanan sa balay sa iyang paryente nga silingan sa mga ginikanan sa masuso sa Brgy. Perrelos, dakbayan sa Carcar.
Si Marfe lumad nga taga Bohol.
Si PO3 Vivian Tamayo, chief Women’s and Children Protection Desk (WCPD) sa Carcar Police Station nga nahinabi sa Superbalita Cebu nagkanayon nga nakuha nila ang usa ka karton nga dunay dugo sa balay nga gipuy-an ni Marfe.
Matod ni Tamayo nga kagahapon sa alas 9 sa buntag gipatawag nila si Marfe uban sa mga kauban niini sa inom.
Kini pulos nanghimakak nga duna silay kalambigitan sa krimen.
Nag-iyahay sila sa pagpanglakaw human sa inom mga alas 12 pasado sa kaadlawon niadtong Huwebes.
Ang masuso napalgan sa magtiayong tiguwang mga ala 1 sa kaadlawon sa samang adlaw dihang nihilak kini ilawom sa kalubihan.
“Human namo sila maimbestigar, gipapauli unya pagkahapon sa alas 3:00 among gisikop si Marfe kay motakdo man ang among nakuhang ebedensiya og pamahayag sa mga kauban,” dugang ni Tamayo.
Ang nakapaduda sa kapulisan kay ang sapot nga gisulti sa mga kaubang saksi, nagsul-ob siyag green nga t-shirt ug jogging pants nga kolor itom.
Apan si Marfe niinsister nga ang iyang gisul-ob mao ang puwa nga t-shirt pares niini nga fatigue nga shorts.
Gibalik nila sa balay si Marfe ug gikuha ang sapot nga gitug-an sa iyang mga kauban.
Didto sab sa balay niini nakuha ang karton nga gigamit niini nga dunay mga dugo.
“Naay dugo ang karton nga iyang katulganan. Pero ato pa ni ipa-examine sa Soco. Kon mo-match ba sa dugo sa kinatawo sa bata,” matod nni Tamayo.
Si Tamayo nibutyag nga niinsister si Marfe nga ang iyang gisul-ob dihang na-inom ang shorts nga fatigue ug t-shirt nga puwa nga nisukwahi sa gitug-an sa mga kauban.
Bisan kon circumstantial evidence ang ilang nahuptan, apan ang tanan mobalik kang Marfe.
Ila usab nga nasayran nga si Marfe dunay kasong pagpanglubos sa Bohol, apan ila pang gisusi.
Samtang si Gudo, maguwang sa masuso, niingon nga posibleng nisulod si Marfe sa ilang balay samtang nangahinanok sila sa pagkatulog.
“Wala na mi makamatikod sir kay kapoy kaayo among lawas,” nagkanayon si Gudo.
Kasong statutory rape ang giandam nga kaso sa kapulisan batok kang Marfe.