PANGULOHAN nila ni National Master Merben Roque, Michael Joseph Pagaran ug Richard Natividad ang sayong mga inilog sa Rose Pharmacy Chess Classic nga sugdan karong hapon sa Knight Attack Chess Cafe sa Robinsons Galleria-Cebu.

Si Roque maoy mi­patigbabaw sa kompetisyon niadtong Mayo sa miaging tuig, si Pagaran sa Hulyo samtang si Natividad niadtong Nobi­yembre.

Naa sab si IM Kim Steven Yap, kansang presensya sa torneyo seguradong makadugang sa hugot sa pinugaay og singot sa utok.

Nahilakip sa mga gipangkonsiderar nga adunay dakong poruhan nga maghari mao ang top kiddies player nga si Je­rish John Velarde lakip na sila si Carlos Moreno, FM Anthony Makinano, NM Rommel Ganzon, Joey Ardiente ug uban pa.

Ang torneyo giorga­nisar ni chess patron Boogie Lim kaabag ang Cebu Executives and Professional Chess Association (Cepca).

Mosubay ang torneyo sa 7-Round Swiss System format ug aduna kini oras nga 25 minutos dugang ang five se­conds increment alang sa matag magduduwa.

Ang kampiyon makabulsa og P5,000 nga ganti. Makadawat sab og ganting salapi ang mahiluna hangtod sa ika-10 nga puwesto.

Ang rehistrasyon nag­balor og P200 samtang P100 alang sa Ladies ug Kiddies players.