SULAYAN sa Misamis Oriental General Comprehensive High School (MOGCHS) nga langkaton ang ilang ika-duhang sunod-sunod nga kadaogan pag-agbat nila karong Sabado, Pebrero 11, batok sa Bulua National High School sa First Cagayan de Oro Inter-Public School Basketball Challenge ladies division sa West City Central School covered court.

Bangis nga giabli sa MOGCHS lady Cavaliers ang ilang kampanya human gitambak nila ang Carmen National High School, 70-16, niadtong Dominggo.

Awhagon na sab sa lady Cavaliers ang serbisyo sa ilang saligando nga center-forward nga si Honey Janubas, kinsa nibira og 21 puntos sa niagi.

Apan, sulayan sab sa Bulua NHS nga mogradwar sa ilang pagkadehado sukad pa sa Oro Speed Inter-Public Schools Basketball League niaging tuig.

Mangulo ang ilang saligando nga guard nga si Mar En Aslon, kinsa usa sa miyembro sa Cagayan de Oro lady cagers nga nilangkat og gold ngadto sa 2016 Northern Mindanao Regional Athletic Association didto sa Camiguin.

Naa sab ang ilang sentro nga si Princess Villanueva nga nahimong usa ka reserve sa sa niaging regionals.

“Makita nato kung nilambo na ba ang Bulua labina naa sila'y saligando,” ingon ni Raul Fuentes, kinsa ang tournament director sa liga.

Paga-abrihan ang mga dula karon agi sa elementarya tali sa PN Roia Elementary School ug West City Central School sa alas 12:30 sa hapon.

Sundan dayon sa dula sa Mogchs ug Bulua sa ala 1:30.

Sa high school boys, magbangi ang Iponan National High School ug East Gusa National High School sa alas 2:30 sa hapon ug sundan dayon tali sa Bulua National High School ug MOGCHS sa alas 3:30 sa hapon.

Ang mga dula karong Sabado:

12:30 p.m. -- P.N. Roa vs West CCS (elementary)

1:30 p.m. -- Bulua NHS vs Mogchs (high school girls)

2:30 p.m. -- Iponan NHS vs East Gusa (high school boys)

3:30 p.m. -- Bulua NHS vs Mogchs (high school boys)