NADAKPAN sa mga personahe sa Detective Management Desk (DMD) sa Cagayan de Oro City Police Office (Cocpo) ang ika-tulo nga most wanted sa dakbayan sa Cagayan de Oro.

Gisilbi sa DMD sa pagpangulo ni Police Senior Inspector Harvey Abellanosa ang warrant of arrest batok sa suspetsado nga si Nicholas Dagala, 25, taga Barangay 35 ning dakbayan.

Gibutyag ni Abellanosa nga suspek si Dagala sa pagpatay sa kaila niining si Bryan Abulag niaging tuig diin gibundakan og bato ang biktima hinungdan sa kamatayon niini.

Giingong nag-inom ang biktima ug si Abulag kuyog ang laing mga higala dihang nagbikil miresulta sa pagpatay.

Human sa insidente, daw misibat si Dagala ug nagpalamig sa area sa Bukidnon apan nibalik dinhi sa dakbayan bag-ohay lamang.

Adunay naka-tip sa mga polis nga anaa ang presensya niini sa dapit hinungdan gilusad ang operasyon pinaagi sa pag-serve sa warrant niini.

Nagtingkagol na sa Maharlika Detention Cell ang dinakpan niining panahona. (SVB)