NAKABSAN sa iyang kinabuhi ang usa ka lalaki human nabanggaan ang gimanehong motorsiklo niini dihang iya untang sundoun ang manghod sa tunghaan sa lungsod sa Manolo Fortich, Bukidnon.
Ang biktima nga si Christopher Jay Gamabutan, 19, ulitawo, residente sa dapit ang gidala og dali sa Northern Mindanao Medical Center (NMMC) sa Cagayan de Oro aron matabang apan pila ka oras ang nilabay sulod sa tambalanan ang nakabsan sa iyang kinabuhi.
Ang ig-agaw sa biktima, niasoy nga nagmotorsiklo si Gamabutan tungod kay iya untang sundoun ang iyang manghod sa eskwelahan apan nabanggaan kini sa usa ka pribadong sakyanan.
Sa kusog nga impak sa pagkabangga, nabunal ang ulo sa biktima ug labihan ang bun-og nga naangkon sa kalawasan maoy gitouhang hinungdan sa iyang kamatayon.
Ang kaso giimbestigahan na karon sa kapolisan sa Manolo Police Station labina pag-ila sa driver.
Laing bangga
Patay sab ang usa ka muslim dihang nawad-an og brake ang gimanehong sakyanan niadtong Huwebes sa gabii, Pebrero 9, sa lungsod sa Laguindingan Misamis Oriental.
Sa report sa NMMC, ang biktima nga si Comocom Macarambon, hingkod ang edad, ang lumad nga taga Marawi City ug paingon unta ning dakbayan sa Cagayan de Oro.
Apan nawad-an kini og brake miresulta sa ilang pagkabangga.
Si Macarambon maoy nagrabehan ug nakabsan sa kinabuhi.
Ang laing mga kauban ang pabiling nagpaalim karon sa balay tambalanan ning dakbayan samtang patay’ng lawas sa biktima giuli na sa iyang pamilya sa Marawi.