GITUOHANG gipaluhod ug gitusak-tusak ang lawas sa usa ka lalaki human giingong gikuha sa mga sakop sa New People’s Army (NPA) sulod sa ilang balay sa Barangay Tikalaan, dakbayan sa Talakag, Bukidnon.
Gibutyag ni Talakag Municipal Police Station Chief Edwin Ipan nga sa ilang imbestigasyon niadtong Huwebes, Pebrero 9, alas 5 sa kadlawon, kalit lang nanuktok sa balay sa biktima nga mao si Lito Atoy ang mga armadong grupo.
Ilang gidala ang biktima sa sitio kilometro 26 ug hapon napalgang patay na kini.
Gihulagway ni Ipan nga ang biktima gi-torture og maayo, gitouhang gipaluhod-luhod gumikan sa mga samad nga naangkon niini sa iyang tuhod ug daghang samad dinunggaban sa lawas ang naangkon.
Sa giluwatang pamahayag sa mga sakop sa NPA, ilang giangkon nga ilang gipatay si Atoy tungod sa labihan nga pagpangabuso niini ug maoy suspek sa nagkadaiyang kawat, tulis, ug uban pa sa area sa Talakag.
Apan matud ni Ipan nga kanhi sakop sa bandido si Atoy ug pormal na nga nibalik sa gobyerno nga maoy gitouhang hinungdan gidumtan sa NPA.
Nangdagit og polis
Gawas pagpatay kang Atoy, mipahigayon sab ang mokabat 200 ka mga NPA og road blocking sa area sa maong barangay ug dinhi nila nababagan si Police Office 2 Anthony Natividad nga sakop sa Kalilangan Police Station.
Paingon unta si Natividad sa dakbayan sa Cagayan de Oro alang sa iyang physical fitness training dihang timing ang pagpangbabag sa mga NPA.
Taliwala wala kini nakauniporma apan nakita ang iyang identification card ug mga uniporme diha sa iyang motorsiklo. Giabandona sab sa NPA ang motorsiklo niini.
Samtang lakip sa mga gikuhaan og cellphone ug kwarta ang pipila ka mga motorist nga milabay sa dapit.
Giingong aduna pay sundalo nga gidagit apan gibuhian.
Sa pagkakaron, giangkon sa NPA nga ilang bihag si Natividad.
Hinuon gihimo na sa mga sundalo ug kapolisan ang ilang mga lakang aron mahibalik ang nadagit nga polis ug gilusad na ang follow up operation batok sa mga walhong grupo.