DEAR Noy Tikyo,

Tagoa lang ko sa name nga Jessy, 21 years old, taga Valencia City. Usa ko ka single mom.

Tagoa lang pod ang name sa laki nga Robert, naay lahi nga Insik, arangan pod, naay maayong trabaho, 41 years old aning amahan sa akong anak.

Nagpaka-ulitawo sa dihang uyab pa mi. Sa dihang nabuntis ko, iya kong gilikayan. Ang pangalan nga iyang gidala dili mao tapos 30 daw iyang edad. Dili man pod halata sa nawong sa minyo.

Tapos gi-blocked niya iyang Facebook human ang usa ka month.

Naa koy amiga sa trabaho, guwapa pod ug sexy. Gipa-try nako og search iyang pangalan, nigawas man iyang FB account.

Nihangyo ko niya nga i-friends niya kay among i-set up.

Kadugayan nangayo og number ang amahan sa akong anak sa akong kauban sa trabaho. Nag-chat-chat sila.

Niabot ang punto nga gipa-blotter nako siya kay na-set up namo siya sa mall.

Naa mi compromise agreement. Naa tanan didto nakabutang, pati pag-eskuwela sa bata naa.

Ang ako lang Noy Tikyo, padagdagan nako og sustento ang bata kay 1 year old pa god ang akong anak.

Kulang lang ang P2,000 sa usa ka month. Ang gi-reply niya sa ako dili daw niya dagdagan.

Usa pa pod kuno basin daw og maundang iyang sustento sa bata kay nagpait na iyang kinabuhi tungod daghan siya og gibuhi.

Tambagi ko, Noy Tikyo, kung unsay angay nakong buhaton. Kay iya baya daw kong ipa-blotter tungod sa akong mga message. Salamat ug God bless.

Jessy

*****

Jessy,

Kon kanang imong giingon nga compromise agreement ngadto sa lalaki nga mohatag og sustento sa iyang anak, inyoha lang nga panagsabot, puwede kang moduol sa barangay o kaha sa hukmanan aron mapugos siyang mohatag nga haum sa iyang kinitaan.

Kay as far as I know, ang sustento sa amahan ngadto sa anak, kon buwag na siya sa iyang asawa, mag-agad sa gidak-on sa iyang kita. Kon maka-afford siya, why not?

Kon tinuod nang imong giingon nga arangan siya ug maayo og trabaho, seguradong maka-afford siya sa imong gipangayo.

Apan posibleng mapakyas ka sa pag-angkon niini kon kamo rang duha ang magsabot. Kay seguradong daghan siya unya og mga alibi, sama sa iyang giingon nimo nga nagpait na siya.

Puriso mas maayo kon moduol ka og barangay o kaha sa abogado aron nga katabangan ka sa angay nimong buhaton.

Mas maayo man god nang mag-atubang mo nga dunay opisyal nga magpatunga o kaha sa abogado aron nga mapugos siyang mohatag sa iyang obligasyon ngadto sa bata base sa iyang tinuod nga kinitaan.

Apan akong nasabot nga gawas ninyo, duna sab siyay kaugalingong pamilya, busa kinahanglan nga inyo sab kining ikonsidera unya sa inyong pag-atubang.

Bahin sa iyang bahad nga magpa-blotter, as long as wa kay gi-text niyang makadaut o merely hangyo lang nga magpadugang og sustento sa iyang anak, wala kay angay nga ikahadlok.

Noy Tikyo