NABUNTURAN, Comval Province - Usa ka tigsuplay og tablon sa minahan ang gipusil patay didto sa Purok 18, Sityo Catian, Barangay Mainit, alas 6:45 sa gabii, Huwebes, Pebrero 9.

Biktima giila nga mao si Ruben Dumagno, 50, minyo, nagpuyo sa Purok 18, Sityo Catian, Barangay Mainit.

Segun sa imbestigasyon ni Police Officer 2 Manuel Gulayan sa Nabunturan Municipal Police Station, ang biktima uban sa iyang mga laborer naglingkod sa pantawan sa ilang balay.

Mga wala mailhing lalaki nga lulan sa motorsiklo ang midangat ug nagtakuban nga mopalit og timber alang sa tunnel.

Dihang giablihan sa biktima ang gate aron pasudlon ang nagpailang buyer, kalit siyang gipusil sa mga suspek sa makadaghang higayon.

Nahiagom og mga samad pinusilan sa nagkadaiyang bahin sa lawas ang biktima nga misangpot sa hinanali niining kamatayon.

Mga suspek paspas nga miigtad paingon sa sentro nga bahin sa Barangay Mainit lulan sa motorsiklo.

Nakig-alayon ang Nabunturan Municipal Police Station sa Compostela Valley Provincial Public Safety Company-Mainit Platoon ug 25th Infantry Battalion, Philippine Army diin gilusad ang pursuit operation, apan wala na igkita ang mga suspek.

Narekober sa kapolisan gikan sa crime scene ang pito ka basiyo ug usa ka balinis sa kalibre .45 nga pistola.

Hangtud sa pagsuwat niining balita, wala pay natumbok nga suspek ang kapolisan busa nagpadayon ang ilang imbestigasyon.