NADAKPAN ang asawa sa usa ka kanhi mayor sa probinsya sa Maguindanao human nalambigit sa ilegal nga droga alas 3:30 sa hapon niadtong Huwebes, Pebrero 9.

Naila ang suspek nga si Fatima Baliwan, alyas shabu Queen, asawa ni kanhi Northern Kabuntalan Maguindanao Mayor Muslimin Baliwan.

Si Fatima, sumala pa, giingong drug lord nga naglihok sa mga probinsya sa Maguindanao, North Cotabato ug sa dakbayan sa Cotabato.

Nasignit sab ang iyang anak nga si Daud Baliwan, mga paryente nga sila Nasser Baliwan ug Tokslami Langiban.

Matud ni Cotabato City Police Office Director Victor Valencia nga nakadawat og taho ang Philippine Drug Enforcement Agency (PDEA) sa Autonomous Region in Muslim Mindanao (Armm) nga nagpatubil sa gasoline station ang grupo ni Baliwan didto sa Jose Lim Street sa dakbayan sa Cotabato.

Abtik nga gi-adtoan sa mga awtoridad ug naabtan ang mga suspek sulod sa sakyanan niini nga mosulay pa unta sa pag-ipsot apan napalibutan na sa puwersa sa PDEA-Armm.

Narekober sa mga ginsakpan sa PDEA-Armm ang usa ka dako nga pakete sa shabu nga nagkantidad og P150 mil base sa drug market value ug usa ka kalibre .45 nga pistola.

Dugay na nga gipanid-an sa PDEA-Armm ang grupo ni Baliwan nga nalambigit sa illegal drug trade sa Maguindanao.

Apan si Fatima namahayag nga dili tinuod nga sila nalambigit sa illegal drug trade ug ang nakuha nga shabu sa ilang sakyanan gitanum lang.

Gisang-at na batok sa mga suspek ang kalapasan sa Section 5 Republic 9165 o Comprehensive Dangerous Drug Act of 2002 apil na ang illegal possession of firearms.