PADADA, Davao del Sur - Way nahimo ang magsuong lalaki, apil ang ilang ig-agaw ang nadakpan sa kapolisan pinaagi sa warrant of arrest gikan sa Padada-Kiblawan 3rd Municipal Circuit Trial Court (MCTC), alas 4 sa hapon, Huwebes, Pebrero 9.

Grupo ni Chief Senior Inspector Renfredo Dacalos Jr. ang miadto sa Barangay Piape sa dakbayan ug gisikop ang mga suspek.

Si Dacalos nag-ila sa mga dinakpan nga sila si Jay-R, 30, ug Reynante Dacillo Martin, 28, ug ilang ig-agaw nga si Joel Hilaga Dacillo, 35, pulos minyo, ug mga molupyo sa Barangay Ogpao sa Sta. Maria, Davao Occidental.

Matud ni Dacallos nga ang warrant of arrest batok sa mga suspek gilagdaan ni Presiding Judge Zarah Aguinsando-Silvosa niadtong Enero 9, tuig kasamtangan.

Nakadoket kini sa criminal case number 8656 ug 8657 sa kasong paglapas sa mga suspek sa Seksyon 93 ug 101 sa Republic Act 10654 o ang giamendahan nga balaod sa Fisheries Code of the Philippines.

Hinuon mga suspek makaangkon pa sa ilang temporaryong kagawasan kon makapiyansa sa kasong giatubang.

Samtang nagpahimangno ang kapolisan sa mga mananagat nga likayan ang ilegal nga pagpanguha og isda ilabi na kon mogamit og mga pino nga pukot aron di makasohan.