ANG Casa Gorordo Museum nagsugod na og panawat sa mga gustong mosalmot sa “A House in the Parian: An Art Contest.”

Ang maong indigay abli alang sa mga estudyante nga nagpangidaron 12 hangtod 16 anyos nga taga-Sugbo o nag-eskuyla dinhi. Ang mga gustong mosalmot mahimong mopili og usa o sa duha ka kategoriya sa “House” o sa “Object.”

“Kahigayonan kini alang sa mga kabatan-onan nga mopakita dili lang sa ilang katakos kundili kahigayonan sab nga mas makakat-on kabahin sa Sugboanong kultura ug kabilin,” pulong ni Florencio Moreño, curator sa museum.

“Kini nga contest haom kaayo kay kini paagi sa museyo pagsaulog sa Pebrero isip Art’s Month,” dugang ni Jazzie Sumalpong, exhibit designer.

Unsaon man pag apil?

Ang mga mosalmot magkinahanglan lang og P500 para sa registration fee nga naglangkob sa mga gamit sama sa Artist kit (24-color oil pastels, pencils, sharpener), Official entry paper, Duha ka oras nga libreng tour sulod sa museyo, libreng ilimnon human sa tour, Event ID, ug limited edition nga post card.

Ang mga interesado mahimong motawag sa Casa Gorordo Museum sa (032) 411-1767, mo-email sa contest coordinator sa jazzie.sumalpong@rafi.org.ph.

Ang pagpangrehistro nagsugod niadtong Pebrero 5 ug matapos Marso 14, 2017. (PR)