GIPA-UBOS sa kustodiya sa kapulisan sa dakbayan sa Carcar ang usa ka Jonathan Marfe, 40 anyos, human kini dudahi nga maoy nag-among-among sa upat ka buwan pa lang nga masuso didto sa barangay Perrelos, Carcar City niadtong Miyerkules sa gabii. Si Marfe higala ra usab sa mga ginikanan sa maong bata. Kini human makit-i sa mga awtoridad ang nagkadugo niini nga t-shirt ingon man kartoon didto sulod sa iyang panimalay nga dili kaayo layo sa balay sa ginikanan sa bata.

Ang maong batang babaye nakit-an na lang sa ilang silingan sa kasagbutan nianang Huwebes sa kadlawon. Nagkadugo ang kinatawo niini og klaro kaayo nga gi-abusuhan. Pastilan no, wala na gyud sa insaktong pangisip ang naghimo sa ingon ngadto sa usa ka anghel. Gikuha ang maong bata nianang Miyerkules sa gabii nga walay kalibutan ang mga ginikanan gumikan kay nakatulog sila gumikan sa kalapoy sa ilang lawas human mamaligya og puto nianang adlawan.

Puro circumstantial evidence ang gihuptan karon sa kapulisan batok ni Marfe kay wala man gyuy nakatumbok nga siya maoy nagkuha sa bata og nag-among-among niini. Ang iyang mga kainum nianang gabii sa wala pa mahitabo ang salaod mibutyag nga ang t-shirt nga nagkadugo maoy gisil-ob ni Marfe niadtong higayona. Kining maong mga ebedensiya dili pa kaayo lig-on nga magtumbok o makapa-kombikto kang Marfe kon masang-at man gani kining maong kaso sa husgado. Gikinahanglan gyud nga manguha og mangalap pa og dugang ebedensiya ang kapulisan aron gyud mapalig-on ang ilang kaso.

Ato lang ipahinumdom sa kapulisan nga lahi ang investigation stage sa level sa kapulisan. Lahi ang pagsang-at niini sa piskaliya nga naoy mohimo sa preliminary investigation og lahi usab kon adto na korte diin ipahigayon ang makuting husay. Lig-ong mga ebedensiya ang gikinahanglan sa korte. Kon magtinapulan ang kapulisan pagpangalap og dugang ebedensiya og pag-presentar og credible nga mga saksi posibling mahuyang ang kaso og maabsuwelto ang akusado.

Sumala unsay nahitabo sa kaso ni Ella Joy Peque, ang 6 anyos nga batang babaye nga gidagit og gipatay matod pa sa usa ka Filipina og usa ka langiyaw. Si Bella Ruby Santos og ang iyang British boyfriend nga si Charles Griffits maoy gitumbok nga responsable sa kamatayon ni Ella Joy. Sa dihang gipasakaan og kaso og samtang nagdagan ang usa ka kaso sa hukmanan, nagtuo gyud kita nga si Bella na ang responsable sa maong krimen. Halos tanan mikondibar ug mibiay-biay kaniya. Apan unsay nahitabo?

Na-absuwelto si Bella og hangtod karon wala pa makaangkon og hustisya ang mga ginikanan ni Ella Joy sa iyang mabangis nga kamatayon. Dili kita gusto nga ang nahitabo sa kaso ni Ella Joy mahitabo aning kaso sa upat ka buwan nga bata. (bobby@sunstar.com.ph)