NAKAIPSOT ang Talk N’ Text KaTropa gikan sa mga pagpanghudlat sa San Miguel Beermen aron iposte ang 87-85 nga kadaugan sa Game 2 nga maoy nakatabla sa ilang best-of-seven semi-finals series sa Philippine Basketball Association (PBA) Philippine Cup.
Naputol sa KaTropa ang 11 ka sunodsunod nga kadaugan sa defending champions gikan pa sa elimination round.
Ang KaTropa kanunay nga naglabaw gikan sa sinugdanan apan wala nagpabiya ang Beermen og dako hangtod na sa katapusang gutlo.
“We conditioned our minds that it was going to be close,” matod ni TNT coach Nash Racela. “Good thing the players were really locked in today.”
Pito ka mga magduduwa sa KaTropa nga gipangulohan ni Troy Rosario ang nakamugna og double-digit nga puntos. Si Rosario nagpakatap og 14 puntos.
Ang Beermen gipangulohan sa Sugbuanong higante nga si JuneMar Fajardo pinaagi sa iyang 25 puntos samtang nidugang og 24 puntos si Alex Cabagnot.
Sa pagpangulo ni Fajardo, ang Beermen nakakailog sa labaw, 82-80, sa hinapos nga bahin.
Nabawi ra sab hinuon dayon sa KaTropa ang labaw nga ilang naprotektahan hangtod na sa pagkapupos sa oras.
Karong gabii, magsangka og balik ang duha ka mga kampo alang sa Game 3 sa series.
Puntos matag usa
TNT 87 – Rosario 14, De Ocampo 13, Tautuaa 12, Pogoy 11, Castro 10, Fonacier 10, Williams 9, Rosser 5, Rosales 3.
SMB 85 – Fajardo 25, Cabagnot 24, Santos 9, Espinas 8, Lassiter 8, Agovida 7, Ross 4. Quarterscores: 20-15, 42-33, 65-59, 87-85.