DUHA ka mga kanhi traffic enforcer sa dakbayan sa Talisay nga padayong nag-operate ug nanakop gamit ang citation pasakaan og kasong kriminal.

Si Mayor Eduardo Gullas mimando karon sa City Legal Office nga pasakaan gayod og kaso ang duha aron pagpatagam.

Nasayran, si Almond Dela Peña, bag-ong pangu sa CT-TODA nibutyag nga iyang nasakpan ang duha ka kanhi enforcer nga nanakop ug drayber sa dumptruck niadtong Biyernes sa hapon sa South Road Properties (SRP) duol sa fish port.

Si dela Peña niingon nga naaktohan niya nga nag-unipormi pa ang duha sa uniform sa CT-TODA dihang nagdalidali sa pagsibat sakay sa motorsiklo hinungdan nga gipa-blotter ni dela Peña ang maong insidente.